देउवा र पौडेलबीच आन्दोलन गर्ने सहमतिपछि कांग्रेस बैठक शुरू

काठमाडौं । प्रमुख प्रतिपक्ष नेपाली कांग्रेसको बैठक भर्खर शुरू भएको छ । दिउँसो १ बजे बोलाइएको केन्द्रीय कमिटी बैठक प्रतिनिधिसभा विघटनविरुद्ध आन्दोलन गर्ने/नगर्ने भन्नेबारे सभापति देउवा र वरिष्ठ नेता रामचन्द्र पौडेलबीचको फरक रायका कारण ढिला शुरू भएको हो ।

आन्दोलनबारे सहमति भएपछि बैठक शुरू भएको हो । देउवा र पौडेलबीच माघ १९ मा भ्रातृ संस्था, २४ गते शुभेच्छुक संस्थाले आन्दोलन गर्ने सहमति भएको छ । त्यस्तै २७ गते जिल्लास्तरमा विरोध कार्यक्रम गर्ने सहमति भएको छ ।

बैठक शुरू हुनुअघि देउवा र पौडेल दुवै गुटको आन्तरिक छलफलमा जुटेका थिए । देउवाले सहमति जुटाएर बैठक बसाउने भनेपछि पौडेल पक्ष उनको चेम्बरमा छिरेका थिए ।