प्रधानमन्त्रीले भने- कोभिडले ह्यान्डसेकलाई बाइबाइ, नमस्तेलाई स्वागत

काठमाडाैं । प्रधानमन्त्री केपी शर्मा ओलीले कोभिड–१९ को कारण मानिसहरुको बीचको अभिवादन र सम्मान प्रकट गर्ने शैली परिवर्तन भएको बताएका छन् । ह्यान्डसेक गर्ने पश्चिमा शैलीलाई बाइबाइ गरेको र हाम्रो सभ्यताको नमस्कारलाई स्वागत गरेको उनको भनाइ छ ।

कोभिड–१९ को खोपको भर्चुअल माध्यमबाट उद्घाटन गर्दै प्रधानमन्त्री ओलीले भने, ‘अंकमाल गर्ने र हात मिलाउने अब छैन । सबैभन्दा राम्रो नमस्कार वा नमस्ते हो भन्ने स्थापित भएको छ । न स्पर्शबाट सर्ने न स्वासप्रश्वासबाट । हाम्रा पूर्वजहरुले राम्रै पत्ता लगाएका रहेछन् ।’

उनले थपे, ‘जानी नजानी अरुका सभ्यता सिक्दा बलियाले अर्काको ह्यात कर्याप्प पारेर आँशु निकाल्ने स्थिति पनि भएन । यसले एकप्रकारले पुनर्जागरणको स्थिति ल्याएको छ ।’