प्रदेश १ मा पनि खोप अभियान सुरु, ढुक्क भएर खोप लगाउन चिकित्सकको आग्रह

विराटनगर । प्रदेश नम्बर–१ मा कोभिड–१९ विरुद्धको कोभिसिल्ड खोप लगाउन सुरु गरिएको छ ।

विराटनगरको कोसी कोभिड–१९ अस्पतालमा कोसी अस्पतालका मेसु चुमनलाल दास र साही अस्पतालका डा. दीपक सिग्देलले पहिलो खोप लगाएर अभियान सुरु गरिएको हो ।

भारत सरकारले अनुदानमा उपलब्ध गराएको खोप आजबाट लगाउन सुरु गरिएको हो । पहिलो चरणमा कोरोनाविरुद्धको खोप लगाएका चिकित्सले खोप सुरक्षित रहेको भन्दै सबैलाई निश्चिन्त भएर खोप लगाउन आग्रह गरेका छन् ।

कोशी अस्पतालद्वारा सञ्चालित कोशी कोभिड उपचार केन्द्रका संयोजक डा दिपक सिग्देलले खोप लगाउँदा आफूहरुलाई केही नभएको भन्दै यो सुरक्षित रहेकोले सबैलाई निश्चिन्त भएर खोप लगाउन आग्रह गरेका हुन् ।

प्रदेश–१ आज २८ हजार ६०५ जनालाई खोप लगाइने जनाइएको छ । खोप लगाउन मोरङमा पाँच, सुनसरीमा चार, इलाम र झापा तीन/तीन र बाँकी १० जिल्लामा एक/एक केन्द्र तोकिएको छ।प्रदेश–१ मा ३५ हजार ५७६ जनालाई खोप दिने सरकारको तयारी छ ।

प्रदेश १ मा कोभिड १९ ‘कोभिसिल्ड भ्याक्सिन’ लगाउने ठाउँ तय गरिएको छ। प्रदेश १ का १४ जिल्लामा १९ खोप केन्द्र निर्धारण गरिएको छ।

निर्धारण खोपकेन्द्रबाट पहिलो चरणमा कोरोना संक्रमितको उपचारमा खटिने स्वास्थ्यकर्मीलाई खोप लगाउन शुरु गरिएको हो ।पहिलो चरणमा बुधबार मोरङ,सुनसरी,झापा,इलाम,उदयपुर,धनकुटा भोजपुर र तेह्रथुममा खोप कार्यक्रम संचालन हुनेछ ।

प्रदेश स्वास्थ्य निर्देशनालयका निमित्ति निर्देशक ज्ञानबहादुर बस्नेतले कुल ३५ हजार ५७६ जनालाई पहिलो र दोस्रो डोज खोप कार्यक्रम रहेको जानकारी दिए ।

बस्नेतका अनुसार यसबाहेक प्रदेशका १४ जिल्लाबाहेक प्रदेश २ का सिरहा–सप्तरीका ७ हजार ६८४ जनालाई खोप लगाउने कार्यक्रमका लागि सम्बन्धित केन्द्रमा भ्याक्सिन पठाइएको छ ।सिरहा र सप्तरीका लागि समेत विराटनगरबाटै खोप पठाइएको प्रदेश स्वास्थय निर्देशनालयल जनाएको छ ।

प्रदेश १ मा कोभिड १९ ‘कोभिसिल्ड भ्याक्सिन’ लगाउने ठाउँ १४ जिल्लामा २३ खोप केन्द्र निर्धारण गरिएको छ। बुधबारदेखि शुरु भएको खोप लगाउने अभियान वहाडी तथा हिमाली ६ बटा जिल्लामा भोलीबाट हुदैछ ।

कुनकुन जिल्लामा कुन बार खोप लगाउने

प्रदेशका पाँचथर, खोटाङ र ओखलढुंगामा बिहीबार र सोलुखुम्बु तथा संखुवासभामा शुक्रबार खोप लगाउने कार्यक्रम तय गरेको छ। ६ जिल्लाबाहेक प्रदेश १ का ८ जिल्लामा बुधबार आज खोप कार्यक्रमको शुभारम्भ गरिएको छ।

कुन जिल्लाको कुन अस्पतालमा खोप केन्द्र

झापाको मेची, दमक र बिर्तामोड अस्पताल, मोरङको कोशी, रंगेली, विराट मेडिकल कलेज र नोबेल अस्पताल, सुनसरीको बीपी, इनरुवा, इटहरी अस्पतालमा खोप लगाउने केन्द्र तोकेको छ।

प्रदेश स्वास्थ्य आपूर्ति व्यवस्थापन केन्द्रमा सोमबार ९ हजार ६०० भायल खोप स्वास्थ्य मन्त्रालयले पठाएको थियो।
केन्द्रले खोपका लागि कोल्ड बक्समा ‘आइसप्याक कन्डिसिन’ सुरक्षा अपनाएर पठाइएको छ ।

एक भायलमा १० डोज खोप हुन्छ । त्यसका लागि आवश्यक पर्ने ‘एडिनालिन इन्जेक्सन र सिरिन्ज’समेत केन्द्रसम्म आएको थियो।