बेलायतबाट नेपाल आउनेलाई पीसीआर र क्वारेन्टिन अनिवार्य

काठमाडौं । नयाँ प्रजातिको कोरोनाभाइरस संक्रमण भएका बेलायत लगायतका मुलुकबाट नेपाल आउने यात्रुले अनिवार्य पीसीआर परिक्षण तथा क्वारेन्टिन लगायतका मापदण्ड पालना गर्नुपर्ने भएको छ ।

लन्डनस्थित नेपाल दुतावासले विज्ञप्ती जारी गर्दै नेपाल जान लागेका यात्रुलाई कोभिड–१९ मापदण्ड लागु गरेको हो ।

७२ घन्टाभित्रको कोभिड परिक्षण रिपोर्ट हुनुपर्ने, यात्राअघि मिति तथा हवाइ उडान सम्बन्धी विवरण राजदुतावासलाई जानकारी दिनुपर्ने, हवाइ टिकट खरिद गर्दा पर्यटन मन्त्रालयले सूचिकृत गरेको होटलमा क्वारेन्टिनका लागि अनिवार्य बुक गरेको हुनुपर्ने सर्त छन् ।

गैरआवसिय नेपालीले यात्रा गर्नुअघि अनिवार्यरुपमा दुतावासबाट भिजा लिनुपर्ने र नेपालसँग सीमा जोडिएका मुलुकको स्थल मार्गबाट यात्रा नगर्नुहुन समेत दुतावासले आग्रह गरेको छ ।

बेलायतमा फैलिएको कोरोनाको नयाँ भेरिएन्ट नेपालमा पनि भेटिएको छ । जसले गर्दा नेपाल सरकारले बेलायत लगायतका मुलुकको यात्रालाई कडाइ गरेको छ ।