देशैले सुने हुन्छ, सभामुखमार्फत् संसद डाकेर ओलीलाई कारबाही गर्छौं : प्रचण्ड (भिडियो)

विराटनगर । विभाजित नेकपा प्रचण्ड-माधव पक्षका अध्यक्ष पुष्पकमल दाहाल ‘प्रचण्ड’ले आवश्यक परे संसद बैठक बसेर प्रधानमन्त्री केपी शर्मा ओलीलाई कारबाही गर्ने दाबी गरेका छन् ।

विराटनगरमा आज आयोजित विरोध सभालाई सम्बोधन गर्दै उनले सभामुखले बैठकको आव्हान गर्ने र सांसदहरू उपस्थित भएर कारबाही गर्नेसम्मको अधिकार आफूहरूलाई संविधानले दिएको जिकिर गरे ।

दाहालले भने,‘संविधानको अधिकार प्रयोग गरेर प्रधानमन्त्री ओलीले गरेको असंवैधानिक र अलोकतान्त्रिक कदम सच्याउन सकिन्छ, तर हामी सर्वोच्चको निर्णय पर्खेर बसेका छौं। सर्वोच्चले सही निर्णय लिनेमा हामीहरू विस्वस्त रहेका छौ ।’

ओलीलाई चेतावनी दिँदै उनले भने, ‘विराटनगरबाट आज म भन्दैछु, देशैले सुने हुन्छ, जरुरी पर्‍यो भने संसदको बैठक बसेर कारबाही गर्छौं।’

प्रधानमन्त्रीले प्रतिनिधिसभा नभइ संविधान नै विघटन गरेको दाहालको तर्क छ । ओली खुरापाती भएको र कम्युनिष्‍ट पार्टीमा पसेर प्रतिक्रान्तिको चंगुलमा बसेको उनले आरोप लगाए ।