सभामुखले संवैधानिक परिषद्को सिफारिस फिर्ता गरेकोमा राष्ट्रियसभा अध्यक्षको असहमति

काठमाडौं । राष्ट्रियसभा अध्यक्ष गणेशप्रसाद तिमिल्सिनाले संवैधानिक परिषदको निर्णय फिर्ता पठाउने सभामुख अग्नि सापकोटाको कदमप्रति असहमति जनाएका छन् ।

संघीय संसद सचिवालयमा दर्ता भएको संसदीय सुनुवाइका लागि पठाइएका पदाधिकारीहरूको नामको निर्णय सक्कल फिर्ता गर्दा आफूसँग सल्लाह नभएको उनले बताएका छन् ।

सोमवार पत्रकार सम्मेलन गरेर अध्यक्ष तिमिल्सिनाले सभामुख सापकाटोले एकल निर्णयका आधारमा संवैधानिक परिषदको सिफारिस फिर्ता गरेको बताए । उनले संघीय संसद सचिवालय भनेपछि आफू पनि त्यसको हिस्सा भएको बताए ।

‘दुवै सदनको प्रतिनिधित्व रहने संसदीय सुनुवाइ समितिका संयुक्त समितिहरु सञ्चालनको अधिकार संघीय संसदको कुनै एक सदन वा पदाधिकारीमा निहित रहेको छैन, अध्यक्ष तिमिल्सिनाले भने, ‘अधिकारप्राप्त निकायबाट आएका कुनै पनि कागजात संघीय संसदको दुवै सदनको सम्पत्ति हो । संसदीय सुनुवाइ सम्बन्धी पत्र फिर्ता सम्बन्धी गलत प्रक्रियामा संघीय संसदको माथिल्लो सदन संलग्नता नरहेको जानकारी गराउँछु ।’