सैन्य ‘कू’ लगत्तै म्यानमारको मन्त्रिमण्डलमा ब्यापक हेरफेर

काठमाडौं । ‘कू’मार्फत सत्तामा नियन्त्रण गरे लगत्तै म्यानमार सैनिकले मन्त्रीमण्डलमा ब्यापक फेरबदल गरेको छ । सोमबार रातीदेखि कर्फ्यु लगाइएको छ र संकटकाल एकवर्ष हुने भनिएको छ ।

नयाँ मन्त्रिमण्डल फेरबदल अन्तर्गत ११ मन्त्री नियुक्त भएका छन् भने २४ जना उपराज्य मन्त्री पदबाट हटाइएका छन् । हटाइने मन्त्रीमा आङ सान सुचिको दलका जननिर्वाचित मन्त्री छन् ।

सेनाले जारी गरेको विज्ञप्तीमा प्रधानन्यायाधीशसहित सर्वोच्च र तल्लो तहको अदालतका न्यायाधीशलाई कार्यालयमै बसेर काम गर्न भनिएको छ । भ्रष्टाविरुद्धको आयोग र मानव अधिकावादी संस्थाका पदाधिकारीलाई पनि अफिसमै रहन भनिएको छ ।

सोमबार त्यहाँको राष्ट्रपति कार्यालयले एकवर्षको लागि संकटकाल घोषणा गरेको थियो भने कार्यपालिका, व्यवस्थापिका र न्यायपालिकाको विशेषाधिकार प्रतिरक्षा मन्त्रालयका प्रमुखलाई हस्तान्तरण गरिएको घोषणा गरिएको थियो ।

सोही दिन स्टेट काउन्सिलर आङसाङ सुकी, राष्ट्रपति विन मिन्ट लगायतलाई पक्राउ गरिएको थियो । साथै सोही दिन निर्वाचन आयोग पुनर्गठन गर्ने र गतवर्ष नोभेम्बरमा भएको चुनाबी प्रणालीलाई पुनर्समिक्षा गर्ने घोषणा पनि सेनाले गरेको थियो ।

सोमबार रातीदेखि सेनाबाहेक अन्य सार्वजनिक टेलिभिजन र अनलाइन मिडिया बन्द गरिएका छन् । इन्टरनेट र टेलिफोन बन्द गरिएको छ । प्रिन्ट संस्करण पनि बन्द छन् । म्यानमारको कूप्रति चीन र रुसबाहेकका देशले विरोध जनाएका छन् ।