प्रहरी अस्पतालमा रक्तदान, प्रथम महिलाले भनिन्– अभियान नै चलाउँ (तस्बिरहरु)

काठमाडौं । प्रथम महिला (प्रधानमन्त्री पत्नी) राधिका शाक्यले कोभिडविरुद्धको भ्याक्सिन जतिसक्दो चाँडो नेपालमा सबै नागरिकलाई पुग्नेगरि उपलब्ध हुने विश्वास व्यक्त गरेकी छन् ।

नेपाल प्रहरी अस्पताल महाराजगन्ज र घुन्सा फाउन्डेसनको संयूक्त आयोजना तथा पठाओ नेपाल प्रालि र विमपन्नका लागि स्वास्थ्य नेपाल सहकारीको सहकार्यमा आयोजित रक्तदान कार्यक्रममा शाक्यले यसबारेमा प्रधानमन्त्री आफैं अग्रसर भइरहेको बताइन् ।

कार्यक्रममा प्रथम महिला शाक्यले रक्तदान गर्नेहरुलाई प्रशंसापत्र प्रदान गर्दै नेपाल प्रहरी अस्पतालले स्वास्थ्य क्षेत्रमा पुर्‍याएको योगदानको प्रशंसा गरिन् । कोभिड–१९ का कारणले रक्तदान नहुँदा धेरै अस्पतालहरूमा रगतको अभाव भएकोले यस्ता अभियान चलाइनुपर्ने उनको भनाइ थियो ।

कार्यक्रममा प्रहरी महानिरीक्षक शैलेश थापा क्षेत्रीले निस्काम भाव राखि समाज सेवा गर्ने मान्छेहरू नामको भन्दा कामको पछि लागेर निस्वार्थ समाज सेवामा लाग्ने बताउँदै स्वास्थ्य सेवामा सहकार्यका लागि नेपाल प्रहरी अस्पताल चयन गरेकोमा घुन्सा फाउण्डेसनलाई धन्यवाद दिए ।

नेपाल प्रहरी अस्पतालमा कार्यरत प्रहरी कर्मचारीहरुले आफूलाई प्रहरी अधिकारी भन्दा पनि चिकित्सकको रुपमा लिनुपर्ने उनले बताउ । उनले युनिफर्मले कतिपयमा दम्भ सिर्जना गर्ने भन्दै चिकित्सकहरु निस्कामभावले लाग्ने बताए ।

कार्यक्रममा १ सय ६ जना पुरुष र २४ जना महिला गरी कुल १ सय ३० जनाले रक्तदान गरेको फाउन्डेसनकी अध्यक्ष याङ्जोम शेर्पाले जानकारी दिइन् ।