भागिरथीको हत्याबारे राष्ट्रिय महिला आयोगले थाल्यो स्थलगत अनुसन्धान

काठमाडौं । बैतडीमा भएको बलत्कार घटनाबारे राष्ट्रिय महिला आयोगले स्थलगत अध्ययन सुरु गरेको छ । आयोगका सदस्य कृष्णकुमारी खतिवडाको नेतृत्वमा २ सदस्यीय टोली अनुगमन तथा अनुसन्धानका लागि घटनास्थल पुगेको हो ।

अध्ययन समितिमा आयोगका कानूनी अधिकृत उर्मिला रोक्का रहेका छन् । टोलीलाई आवश्यक सहयोग पुर्याउन आयोगले सम्बन्धित सबै पक्ष तथा सरोकारवालाई आग्रह गरेको छ । राष्ट्रिय मानव अधिकार आयोगको सुदूरपश्चिम प्रदेशको टोलीसँग राष्ट्रिय महिला आयोगको टोली पुगेर आजैबाट छुट्टै अध्ययन सुरु गरिसकेको टोलीको नेतृत्व गरेकी आयोगकी सदस्य खतिवडाले घटनास्थल बैतडीबाट नेपाल प्रेसलाई जानकारी दिइन् ।

उनका अनुसार आयोगको टोलीले आज बैतडी पुगेर स्थलगत अध्ययन सुरु गरेको छ । मंगलबार पनि अध्ययन गरेर आयोगको टोली काठमाडौं फर्किएपछि प्रतिवेदन तयार गर्ने छ । त्यसपछि आयोगले छलफल गरेर सरकारलाई आवश्यक निर्देशन दिने सदस्य खतिवडाले बताइन् ।

राष्ट्रिय महिला आयोगले बलत्कार तथा हत्याको घटनामा ध्यनाकर्षण भएको जनाउदै दोषीलाई कानूनी दायरमा ल्याइ निष्पक्ष र प्रभावकारी अनुसन्धान गर्न सरकारसँग आग्रह गरेको आयोगका अध्यक्ष कमला पराजुलीले नेपाल प्रेससँग बताइन । उनका अनुसार घटनाको अनुगमन तथा अनुसन्धानका लागि आयोगले गृह मन्त्रालय र राष्ट्रिय मानव अधिकार आयोगसँग पनि छलफल गरिसकेको छ ।

आयोगले हिंसाजन्य यस्ता गम्भीर घटनाले व्यक्तिको जिउ ज्यानको सुरक्षा र मानव अधिकारीको गम्भीर उल्लंघन भएको आयोगका सचिव शान्ता अधिकारीले जारी गरेको विज्ञप्तिमा भनिएको छ ।

‘आगामी दिनमा यस्ता खालका घटना दोहोरिन नदिनेतर्फ सचेत रहँदै निष्पक्ष र प्रभावकारी अनुसन्धानमार्फत घटनाको सत्यतथ्य उजागर गरी दोषीलाई कानून बमोजिम कारवाहीको दायरामा ल्याउन र पीडित परिवारको सुरक्षा तथा न्यायमा पहुँच पुर्याउन आयोग नेपाल सरकारको ध्यानाकर्षण गराउँछ,’ विज्ञप्तीमा उल्लेख छ ।

बैतडीको दोगडाकेदार गाउँपालिका–७ स्थित सनातन धर्म माध्यमिक विद्यालय खोचलेकमा कक्षा १२ मा अध्ययनरत १७ वर्षका किशोरी भगिरथी भट्ट माघ २१ गते दिउँसो हराएकी थिइन् । भोलिपल्ट दिउँसो साढे ४ बजे लवलेक सामुदायिक वनमा विभत्स अवस्थामा उनको शव भेटिएको थियो । भागिरथीको बलत्कारपछि हत्या भएको प्रहरीले जनाएको छ ।