कोरोना खोपमा ज्येष्ठ नागरिकलाई प्राथमिकता देऊ: विवेकशील साझा

काठमाडौं । कोभिड -१९ विरुद्धको खोप अभियानमा राज्यले ज्येष्ठ नागरिकहरूमाथि गरेको उपेक्षाप्रति विवेकशील साझाले आपत्ति जनाएको छ ।

पार्टीको साझा ज्येष्ठ नागरिक संगठनले आइतबार विज्ञप्ति जारी गर्दै कोरोना भाइरस सङ्क्रमणबाट मृत्यु हुनेमा सबैभन्दा उच्च जोखिममा रहेका ज्येष्ठ नागरिकहरूलाई सरकारले खोप अभियानको तेस्रो चरणसम्ममा पनि प्राथमिकतामा नपार्नु दुखद भएको बताएको हो ।

संगठनले विश्वभर ज्येष्ठ नागरिकहरूलाई प्राथमिकतामा राखी कोभिड १९ विरुद्धको खोप दिइँदै गरिएकोमा नेपालमा यो वर्गमाथि सरकारले गरेको विभेदले सामाजिक न्याय र सुरक्षाप्रति सरकारी उदासीनता पुनः छर्लङ्ग भएको भन्दै आलोचना गरेको छ ।

संगठनका संयोजक महेनमोहन श्रेष्ठले खोप अभियानको यसपछिको चरणमा ज्येष्ठ नागरिकलाई मुख्य प्राथमिकतामा राख्न  सरकारसँग माग गरेको बताए ।