करिश्माले बुटिक रेष्टुरेन्ट संचालनमा ल्याउने, श्रीपञ्चमी अवसरमा गरिन् शिलान्यास

काठमाडौं । बसन्त पञ्चमी अर्थात सरस्वती पूजा धार्मिक रुपमा पवित्र मानिन्छ । काम गर्न साइत हेर्नु पर्दैन भन्ने आम मान्यता छ । नेपाली फिल्म क्षेत्रमा पनि मंगलबार नयाँ कामको थालनी गरिएको छ ।

आज केही निर्माताले फिल्मको शुभमुहूर्त र निर्माणको घोषणा गरेका छन् । केहीले भने नीजि कामको थालनी गरे । निर्मात्री एवं अभिनेत्री करिश्मा मानन्धरले पनि श्रीपञ्चमीलाई नयाँ साइतको रुपमा लिएकी छिन् ।

गोदावरीस्थित आफ्नो घर पछाडिको खाली जग्गामा करिश्माले बुटिक रेष्टुरेन्ट संचालनमा ल्याउन लागेकी छिन् । दुई वर्षभित्र संचालनमा ल्याउने योजना बुनिएको रेष्टुरेन्टको मंगलबार करिश्मा र उनका पति विनोदले शिलान्यास गरेका छन् ।

‘बुटिक रेष्टुरेन्ट बनाउने गरि व्यवसायिक उद्देश्यले भवन बनाउन लागेकी हुँ’ करिश्माले नेपाल प्रेससँग भनिन्, ‘अहिले बसिरहेको घरभन्दा आराम र शान्त पनि हुनेछ ।’