बैतडी घटनाबारेको स्थलगत प्रतिवेदन महिला आयोगद्वारा गृहमन्त्रीलाई हस्तान्तरण

काठमाडौं । राष्ट्रिय महिला आयोगले भागीरथी भट्टको घटनाको स्थलगत प्रतिवेदन सरकारलाई बुझाएको छ । आयोगका सदस्यसहितको टोली बैतडी पुगेर घटनाको स्थलगत अध्ययन गरेपछि आयोगले तयार पारेकाे प्रतिवेदन गृहमन्त्री रामबहादुर थापालाई बुझाएको हो ।

आयोगले स्थलगत प्रतिवेदनमार्फत पीडकलाई हदै सम्म दण्ड सजाय गर्न र पीडितको परिवारको सुरक्षा, संरक्षण र क्षतिपूर्ति उपलब्ध गराउन पनि निर्देशन दिएकाे  छ ।

आयोगका अध्यक्ष कमला पराजुलीको नेतृत्वमा आयोगको टोलीले माघ २१ गते बैतडी जिल्लामा भागीरथी भट्टको बलात्कार पछि हत्या भएको घटनाको छानबिन र स्थलगत अनुगमनको प्रतिवेदन बुझाएको अध्यक्ष पराजुलीले नेपाल प्रेसलाई जानकारी गराइन । उनका अनुसार गृहमन्त्री थापाले बलात्कारपछि हत्या गर्ने व्यक्तिलाई हदैसम्मको कारवाहि गर्नका लागि सरकार पछि नहट्ने प्रतिवद्वता जनाएको बताइन ।

स्थलगत अध्ययन अनुगमनका लागि राष्ट्रिय महिला आयोगका सदस्य कृष्णकुमारी पौडेलको नेतृत्वमा आयोगको टोली बैतडीको दोगडाकेदार पुगेको थियो ।