चार दिनदेखि आमरण अनसनमा रहेका कोइरालाले तोडे अनसन

काठमाडौं । सरकारले पूँजी बजार विकास र विस्तारका लागि गर्नुपर्ने काम नियामक निकाय धितोपत्र बोर्ड र नेपाल स्टक एक्सचेञ्जले नगरेको भन्दै लगानीकर्ता तिलक कोइराला आमरण अनसनमा बसेका थिए ।

फागुन २ गतेदेखि शुरु गरेको आमरण अनसन कोइरालाले बुधबार तोडेका छन् । सरकारले शेयर बजार सम्बन्धी १८ ओटा बुँदामा कुनै काम नगरेको भन्दै लगानीकर्ता कोइरालाले गत आइतबारदेखि  आमरण अनसन शुरु गरेका थिए ।

नेप्सेको परिसरमा गरिएको आमरण अनसनमा कोइरालाको स्वास्थ्यमा समस्या आएपछि लगानीकर्ताका विभिन्न संघ संगठन र उद्योग बाणिज्य महासंघको पनि सहभागितामा धितोपत्र बोर्ड उनले राखेका माग सम्बन्धी छलफल भएको थियो ।

सो छलफलपछि बोर्डका अध्यक्षले लगानीकर्ताले राखेको माग जायज भएको भन्दै त्यसको कार्यन्वयनमा आफू लाग्ने भनेपछि कोइरालाले आज अनसन तोडेका हुन् ।