पूर्वअर्थसचिवहरूको सुझाव- महामारीले थलिएको क्षेत्र पहिचान गरी बजेट बनाऔं

काठमाडौं । कोरोना महामारीबाट थला परेको अर्थतन्त्र पुनरुत्थानको सुझावको लागि अर्थ मन्त्रालयले पूर्वअर्थसचिवहरूसँग छलफल गरेको छ ।

बुधबार आयोजित छलफल कार्यक्रममा पूर्वअर्थ सचिवहरूले अर्थतन्त्र सुधारका लागि आगामी आर्थिक वर्षको बजेटको मोडालिटीबारे सुझाव दिएका छन् । उनीहरुले स्वास्थ्य क्षेत्रको पूर्वाधार विस्तार एवं क्षमता विकासलाई पनि जोड दिए ।

पूर्वमुख्यसचिव तथा अर्थसचिव डा. विमल कोइरालाले महामारी र निर्वाचनको घोषणाले आगामी आर्थिक बजेट निर्माणमा चुनौती थपिएको बताए ।

पूर्वमन्त्री एवम् पूर्वअर्थसचिव विद्याधर मल्लिकले विकासलाई केही आर्थिक परिसूचकमा सीमित राख्नुभन्दा समग्रतामा हेर्नुपर्ने आवश्यकता रहेको वताए ।

अर्का पूर्वअर्थसचिव रामेश्वर खनालले व्यवसायिक वातावरण निर्माण र नीतिगत एवं कानूनी सुधारतर्फ जोड दिए । उनले सबै क्षेत्रमा सुधारसहितको बजेट जरुरी रहेको औल्याउँदै खर्च प्रणालीलाई बढाउन आवश्यक भएको बताए ।

पूर्व अर्थ सचिव डा. शान्ताराज सुवेदीले कोभिड-१९ लाई अवसरका रूपमा लिएर कोभिड-१९ जे असर गरेको क्षेत्र पहिचान गरी सम्बोधन गर्ने गरी बजेट ल्याउन जरुरी रहेको सुझाए ।