तस्वीरमा हेर्नुहोस् एपिएफको उपाधि ‘सेलिब्रेसन’
काठमाडौं । पहिलो पटक डबल लिग पद्धतिमा सम्पन्न भएको राष्ट्रिय महिला लिगमा ‘इन्भिन्सिबल’ रहँदै एपिएफ क्लब च्याम्पियन बन्यो । सतप्रतिशत नतिजासहित लिग लिडर रहेको एपिएफले दुई खेल अगावै उपाधि सुनिश्चित गरिसकेको थियो ।
र, शुक्रबार भएको अन्तिम खेलमा विभागीय प्रतिद्वन्द्वी त्रिभुवन आर्मी फुटबल क्लबलाई ३-० को नतिजामा पराजित गर्दै लिगको सुखद् सुरुआत गर्यो । पहिलो हाफको अन्तिम मिनेटमा सरु लिम्बुले गोल गर्दै एपिएफलाई अग्रता दिलाएकी थिइन् ।
दोस्रो हाफमा थप आक्रमक बनेको एपिएफका लागि ८६औं मिनेटमा अनित केसीले गोल गर्दै टोलीको अग्रता दोब्बर पारिन् । लिगको मोस्ट भ्यालुएबल खेलाडीसमेत घोषित भएकी सरुले इन्जुरी समयमा व्यक्तिगता दोस्रो गोल गर्दै टोलीको सहज जित सुनिश्चित गरिन् ।
लिगमा एकतर्फी नजिता निकाल्दै च्याम्पियन बनेको एपिएफ क्लबले १५ लाख रूपैयाँ प्राप्त गरेको छ ।
त्यस्तै, दोस्रो भएको त्रिभुवन आर्मी क्लबले ८ लाख तथा तेस्रो भएको नेपाल पुलिस क्लबले ५ लाख रूपैयाँ प्राप्त गरेको छ । फेयर प्ले टीमले थप १ लाख ५० हजार प्राप्त गर्ने आयोजकले बताएको छ । लिगमा सहभागी हुने सबै टोलीले १ लाख रूपैयाँ तयारी खर्च र ५० हजार रूपैयाँ कोरोना राहत प्राप्त गरे ।
लिगकी सर्वोत्कृष्ट घोषित हुने खेलाडीले स्कुटर तथा उत्कृष्ट स्ट्राइकर, मिडफिल्डर, डिफेन्डर र प्रशिक्षकले ५० हजार रूपैयाँ प्राप्त गरे ।
प्रकाशित: २०७७ फागुन ७ गते २०:०६
