दुई वर्षपछि प्रधानमन्त्री ओली विराटनगर आउँदै, सुरक्षा व्यवस्था कडा

विराटनगर । प्रधानमन्त्री केपी शर्मा ओलीसहित शीर्षनेताहरू आज नेकपा (ओली पक्ष)को प्रदेशस्तरीय आमसभालाई सम्बोधन गर्न विराटनगर आउँदै छन् ।

दुई वर्षपछि प्रधानमन्त्री ओली विराटनगर आउन लागेका हुन् । २०७५ जेष्ट २६ गते अन्तिम पटक प्रधानमन्त्री ओली १ नम्बर प्रदेशको सम्बोधन गर्ने विराटनगर आएका थिए ।

विराटनगरमा आज अपरान्ह हुने आम सभालाई सम्बोधन गर्न ११ बजे प्रधानमन्त्री ओलीसहितका पार्टीका शीर्ष नेता प्रदेशको राजधानी विराटनगर आउने कार्याक्रम रहेको नेकपाका केन्द्रीय सदस्य विनोद ढकालले जानकारी दिए ।

प्रधानमन्त्री ओलीसहित गृहमन्त्री रामबहादुर थापा ‘बादल’, सुवाष नेम्वाङ, मुख्यमन्त्री शेरधन राई लगायतका शिषर्ननेताहरुले सभालाई सम्बोधन गर्ने कार्याक्रम रहेको छ ।

संसद विघटनपछि प्रधामन्त्री ओलीलाई प्रमुख अतिथीका रुपमा राखेर प्रदेश १ को राजधानी विराटनगरमा पहिलो पटक आम सभाको आयोजना गरिएको हो ।

विराटनगर महानगरपालिका-२ स्थित विराट नर्सिङ होमको पूर्वतर्फ रहेको मैदानमा आयोजित आमसभामा दुई लाख भन्दा बढीको कार्याकर्ताको सहभागीता रहने केन्दीय सदस्य ढकालले बताए ।

केन्द्रीय सदस्य ढकालका अनुसार जनसभामा उपस्थिति जनाउनेहरुका लागि प्रदेशका मुख्य शहर लगाउत स्थानीय तहमा एक हजार पाँच सय सार्वजनिक बसको व्यवस्था गरिएको छ। त्यसबाहेक मोटरसाइकल मात्रै १० हजार समर्थक आउने अनुमान छ।

आमसभाका लागि विराटनगरको कञ्चनबारी, रोडशेष, तीनपैनी, हाटखोला लगायतका चोकबाट जुलुस निकालिने छ । विराटनगरको सभा सम्बोधन गरी आजै प्रधानमन्त्री ओली ४ बजे काठमाण्डौ फर्कने कार्याक्रम रहेको छ ।

सभामा अत्याधिक भिड हुने भएकाले ओलीसहित शीर्ष नेताहरुले गर्ने सम्बोधनलाई विराटनगरका मुख्यचौकका दुई स्थानबाट स्क्रिनमार्फत देखाउने तयारी छ । प्रधानममन्त्रीसहितको शिर्षनेताहरुले सम्बोधन गर्ने सभालाई कार्यक्रमस्थललाई सिङ्गार्ने झकिझकाउन बनाइएको छ ।

यसअघि नेकपाको दाहाल–नेपाल पक्षले विराटनगमा विरोध सभा सम्पन्न गरीसकेको छ ।

सुरक्षा व्यवस्था कडा

सभामा प्रमुख अतिथिका रूपमा प्रधानमन्त्री ओलीसहित शीर्ष नेता विराटनगर आउने भएपछि यहाँको सुरक्षा व्यवस्था कडा बनाइएको छ ।

विराटनगरमा चारवटै सुरक्षा निकाय नेपाली सेना, नेपाल प्रहरी र सशस्त्र प्रहरी तथा राष्ट्रिय अनुसन्धानबाट सुरक्षाको प्रबन्ध मिलाइएको छ । आज बिहानैदेखि विराटनगरमा ठूलो संख्यामा सुरक्षाकर्मी परिचालन गरिएका छन् ।

ठाउँ-ठाउँमा नेपाल र सशस्त्र प्रहरीको उपस्थिति बाक्लो बनाइएको छ । सादा पोशाकका सुरक्षाकर्मी पनि उत्तिकै संख्यामा परिचालन गरिएको छ ।

सुरक्षा व्यवस्था मजबुत बनाउन नेपाली सेनाको टोली सादा पोशाकमा खटिएको छ । मोरङ प्रहरी प्रमुख एसपी सन्तोष खड्काले विराटनगर र आसपासका स्थानको सुरक्षा व्यवस्था कडा पारिएको जानकारी दिए ।

‘हामीले सुरक्षा व्यवस्था पहिल्यैदेखि मजबुत बनाएका छौँ,’ उनले भने, ‘प्रधानमन्त्रीको सवारी हुने भएकाले सुरक्षाका हिसाबले सबै उच्च सतर्कता अपनाइएको छ ।’नेकपाको ओली पक्षले यसअघि धनगढी, काठमाडौं लगायतका स्थानमा पनि आमसभाको आयोजना गरिसकेको छ ।