कोरोनाविरुद्ध रामदेवले ल्याए ‘कोरोनिल’ आयुर्वेद औषधि

काठमाडौं । योग गुरु रामदेवको पतञ्जलीले कोरोनाभाइरसविरुद्धको औषधि ‘कोरोनिल’ सार्वजनिक गरेको छ । दिल्लीमा आयोजित पत्रकार सम्मेलनमा रामदेवले पतञ्जली योगपीठले विकास गरेको मेडिसिन लन्च गरे ।

यो लन्च समारोहमा भारतीय स्वास्थ्य मन्त्री हर्षवर्धन र यातायात मन्त्री नितिन गड्करी पनि सहभागी थिए । सो अवसरमा रामदेवले कोरोनिल औषधिबारे तयार पारिएको वैज्ञानिक कार्यपत्र पनि प्रस्तुत गरेका थिए ।

रामदेवले ल्याएको कोरोनाविरुद्धको औषधिलाई पहिलो आयुर्वेदिक औषधि भनिएको छ । यो औषधिले विश्व स्वास्थ्य संगठनको मापदण्ड अन्तर्गत रहेर भारतको केन्द्रीय औषधि गुणस्तर नियमन विभागबाट मान्यता प्राप्त गरेको छ ।

विश्वका १५८ देशमा औषधि वितरण गरिने रामदेवले जनाएका छन् । भारतको प्राचीन औषधि पद्धति आयुर्वेदअन्तर्गत रहेर पतञ्जली रिसर्च इन्स्टिच्युटले कोरोनिल औषधि विकास गरेको हो । पत्रकार सम्मेलनमा बोल्दै रामदेवले यो औषधिले सस्तो मूल्यमा मानवताको सेवा गर्ने बताए ।

सो अवसरमा भारतका केन्द्रीय स्वास्थ्य मन्त्री हर्षवर्धनले भारतको आयुर्वेद विज्ञानलाई अन्तर्राष्ट्रिय स्तरमा लैजानुपर्ने र यसका लागि सरकारले सहयोग गर्ने बताए ।