निफ फेस्टिभलमा ३१ देशका ६३ फिल्मले प्रतिस्पर्धा गर्ने

अन्तराष्ट्रिय चलचित्र महोत्सव (निफ)ले आगामी फेस्टिभलको फिल्म लाइनअप घोषणा गरेको छ । वैशाख २३ गतेदेखि २७ गतेसम्म काठमाण्डौमा आयोजना हुने फेस्टिभलमा ५२ देशका ४ सय ५० भन्दा बढी फिल्म प्रदर्शन गरिने आयोजक संस्था नेपाल चलचित्र तथा सांस्कृतिक प्रतिष्ठानका अध्यक्ष केपी पाठकले बताए ।

कोरोना महामारीको कारण फिचर फिल्मको छनौटलाई थाँती राख्दै ३१ देशका ६३ वटा फिल्म प्रतिस्पर्धामा छनौट भएको उनले बताए । ‘नेपाली फिल्म प्रदर्शनमा आउन बाँकी रहेकोले निर्माताले केहि समयको माग गर्नु भएको छ । जसलाई मध्यनजर गर्दै हाम्रो टिमले अन्य प्रतिस्पर्धी सार्वजनिक गरेका छौं’ पाठकले भने ।

निफको चौथो संस्करणलाई पछिल्ला अनुभवले अझै सभ्य र भव्य बनाउने उनको टिमको तयारी छ । ‘विश्वका कथाहरुको कथ्य उत्सव’ भन्ने नाराका साथ ‘फिल्म संस्कृति’ को विकास गर्ने उद्देश्यले सुरु भएको फेस्टिभलमा यो वर्ष महामारीको विषयमा बनेका फिल्मलाई अलग्गै खण्डमा प्रतिस्पर्धा गराइ अवार्ड पनि वितरण गरिने छ ।

कोभिड–१९ ले पारेको प्रभावमा बनेका यस्ता फिल्मले ५ सय अमेरिकी डलर तथा ट्रफी प्राप्त गर्नेछन् । अन्तर्राष्ट्रिय प्रतिष्पर्धाअन्तर्गत सर्वोत्कृष्ट फिचर फिल्मलाई१५ सय अमेरिकी डलर राशिसहित गौतमबुद्ध अवार्ड प्रदान गरिने जनाइएको छ ।