बाबुराम भट्टराईलाई भोलि अस्पताल भर्ना गरिने

काठमाडौं । स्वास्थ्य परीक्षणका लागि नयाँ दिल्ली पुगेका पूर्वप्रधानमन्त्री तथा जनता समाजवादी पार्टी (जसपा) का संघीय परिषद् अध्यक्ष डा. बाबुराम भट्टराईलाई भोलि अस्पताल भर्ना गरिने भएको छ ।

उनले आज चिकित्सकसँग प्रारम्भिक स्वास्थ्य परामर्श गरेका छन् । प्रेस सल्लाहकार विश्वदीप पाण्डेका अनुसार थप परीक्षण र उपचारका लागि भारतको नयाँ दिल्लीस्थित ‘इन्स्टिच्युट अफ लिभर एण्ड बिलिअरी साइन्सेस’ मा भट्टराईलाई भोलि भर्ना गरिने छ ।

पेटमा समस्या देखिएपछि भट्टराईले लामो समयदेखि काठमाडौंको निदान अस्पतालमा परीक्षण तथा उपचार गराउँदै आएका थिए ।

चिकित्सकले न्युरो-इन्डोक्राइनको ट्युमर भएको आशंका गरी चिकित्सककै सल्लाहअनुसार भट्टराई नेपाल वायु सेवा निगमको जहाजबाट सोमबार दिल्ली दिल्ली गएका हुन् ।