‘बी’ डिभिजन लिगमा खुमलटारको नाटकीय जित

काठमाडौं । महेश राईको दुई गोल प्रेरित खुमलटार युथ क्लबले शहीद स्मारक ‘बी’ डिभिजन लिगमा मंगलबार पुल्चोक स्पोट्स क्लबलाई ५-२ को नतिजामा पराजित गरेको छ । कोरोना भाइरसको कारण झण्डै एक वर्ष पछाडी धकेलिएको खेल मंगलबारदेखि पुनः सुचारु भएको छ ।

सातदोबाटोस्थित एन्फा कम्प्लेक्समा भएको खेलको २९औं मिनेटमा महेशले गोल गर्दै खुमलटारलाई अग्रता दिलाएका थिए । पहिलो हाफको खेल सकिन पाँच मिनेट बाँकी रहँदा मिन बहादुर गुरुङले गोल गर्दै पुल्चोकलाई बराबरीमा ल्याएका थिए ।

दोस्रो हाफको चौथो मिनेटमा किस्मत लिम्बुले गोल गर्दै पुल्चोकलाई २-१ को अग्रता दिलाए । २-१ ले पछि परेको खुमलटार आक्रामक शैलीमा प्रस्तुत भएको थियो । खुमलटारका लागि सबिन केसीले ५२औं मिनेटमा पेनाल्टीमार्फत् बराबरी गोल फर्काएका थिए । त्यसको ६ मिनेट नबित्दै आयुश घलानले खुमलटारका लागि तेस्रो गोल गरे ।

महेशले ६२औं मिनेटमा व्यक्तिगत दोस्रो गोल गर्दै टोलीको अग्रता ४-२ मा पुर्‍याएका यिए । त्यसको तीन मिनेट नबित्दै मनिष राईले खुमलटारका लागि पाँचौ गोल गरे । मनिषको गोलसँगै खुमलटारले लिगमा पाँचौ जित दर्ता गर्‍यो । लिगमा ६ खेलबाट १६ अंक बटुलेको खुमलटार तालिकाको शीर्ष स्थानमा उक्लिएको छ । पराजित पुल्चोक समान खेलमा एक अंकसहित तालिकाको ११औं स्थानमा छ ।