बाँसबारीको जितमा भिष्मराजको दुई गोल

काठमाडौं । भिष्मराज घिमिरेको दुई गोल प्रेरित बाँसबारी क्लबले शहीद स्मारक ‘बी’ डिभिजन लिगमा बुधबार टुसाल क्लबलाई ३-१ को नतिजामा पराजित गरेको छ ।

सातदोबाटोस्थित एन्फा कम्प्लेक्समा भएको खेलको पाँचौं मिनेटमा भिष्मराजले गोल गर्दै बाँसबारीलाई अग्रता दिलाएका थिए । त्यस्तै, ३४औँ मिनेटमा व्यक्तिगत दोस्रो गोल गर्दै भिष्मराजले बाँसबारीको अग्रता दोब्बर पारे ।

पहिलो हाफमा २-० ले अगाडी रहेको बाँसबारीका लागि ५४औं मिनेटमा अनिल गुरुङले तेस्रो गोल गरेका थिए । बाँसबारीको आक्रमणसामु टिक्न नसकेको टुसालका लागि सुनिल धामीले ७०औं मिनेटमा एक मात्र गोल फर्काएका थिए ।

जितसँगै बाँसबारी ६ खेलबाट १४ अंक जोडेर लिग तालिकाको तेस्रो स्थानमा उक्लेको छ । पराजित टुसाल ६ खेलबाट ८ अंक सहित छैठौँ स्थानमा छ ।