कोरोनाबाट मृत्यु हुनेको संख्यामा ६१८ थप, चार लाखले लगाए खोप

काठमाडौं । स्वास्थ्य मन्त्रालयले कोभिड-१९ बाट मृत्यु हुनेको कूल संख्यामा ६१८ थप गरेको छ । स्वास्थ्य मन्त्रालयद्वारा आयोजित प्रेस ब्रिफिङमा प्रवक्ता जागेश्वर गौतमले मृतकको संख्यामा अद्यावधिक गरिएको र भविष्यमा पनि थपघट हुने जनाए ।

बिगत २४ घन्टामा ३ हजार ६९२ पीसीआर परिक्षण भएको छ । जसमध्ये ९४ संक्रमण पुष्टि भएको छ । काठमाडौं उपत्यकामा भक्तपुरमा २, ललितपुरमा १२ र काठमाडौंमा ३३ गरि जम्मा ४७ संक्रमण पुष्टि भएको छ । अहिले १,५५५ सक्रिय संक्रमित संख्या रहेको छ ।

अहिलेसम्म नेपालमा कूल संक्रमित संख्या २ लाख ७३ हजार ७६० र कूल मृतक संख्या २,०६६ रहेको छ । यो संख्यामा अद्यावधिक गरेर मन्त्रालयले ६१८ मृतक थप गरेको हो । कूल मृतक संख्या २,६८४ पुगेको छ । शव व्यवस्थापन गर्ने जिम्मा पाएको सीसीएमसीको जानकारीका आधारका मृतक थप गरिएको हो ।

खोप लगाउनेको संख्या ४ लाख नाघ्यो

मन्त्रालयका अनुसार अहिलेसम्म खोप लगाउनेको संख्या ४ लाख २९ हजार ७०५ पुगेको छ । सरकारले लक्षित वर्ग मानेको संख्याको ८५ प्रतिशतलाई खोप लगाइसकिएको छ । जसमा ६,७८९ जना पत्रकारले लगाएका छन् ।

फागुन २३ गतेदेखि ५५ वर्ष माथिका नागरिकलाई खोप दिइने भएको छ । जसमा सवारी चालक र सहचालक पनि समावेश छन् । नेपालमा प्रयोगमा ल्याइएको कोभिसिल्ड खोपको गम्भिर साइड इफेक्ट नदेखिएको स्वास्थ्य मन्त्रालयले जनाएको छ ।