मुस्ताङ जिल्ला इन्चार्जलाई बिना सर्त रिहा गर्न विप्लव नेतृत्वको नेकपाको माग

काठमाडौं । प्रतिबन्धित नेपाल कम्युनिस्ट पार्टी (विप्लव समूह)ले मुस्ताङ जिल्ला इन्चार्ज फिल्टरलाई बिना सर्त रिहा गर्न माग गरेको छ ।

नेकपाका धौलागिरी ब्युरो इन्चार्ज राजनले शुक्रबार वक्तव्य जारी गर्दै जिल्ला इन्चार्ज ‘फिल्टर’लाई रिहा नगरे त्यसबाट उत्पन्न हुने परिस्थितिको जिम्मेवार सम्बन्धिन पक्ष हुने चेतावनीसमेत दिएका छन् ।

वक्तव्यमा राजनले पार्टीका कार्यकर्ता फिल्टरलाई म्याग्दीको मालिका गाउँपालिका-४ रूम गाउँबाट बिनाकारण गिरफ्तार गरेको भन्दै घोर आपत्ति जनाएका छन् ।

‘२०७७ फागुन १३ गते हाम्रो पार्टीका मुस्ताङ इन्चार्ज कमरेड फिल्टरलाई राजनीतिक अभियानको सिलसिलामा म्याग्दीको मालिका गाउँपालिका-४ रूम गाउँबाट बिनाकारण गिरफ्तार गरेको घटनाप्रति घोर आपत्ति एवम् खेद प्रकट गर्दछ ।

कम्युनिस्ट आन्दोलनमा समर्पित एक इमान्दार कमरेड फिल्टरको बिना सर्त रिहाइको माग गर्दछौं । अन्यथा त्यसबाट उत्पन्न परिस्थितिको जवाफदेही सम्बन्धित पक्ष हुनुपर्ने जानकारी गराउँदछौँ,’ वक्तव्यमा भनिकएको छ ।