गौतमबुद्ध विमानस्थलबाट चल्ने ट्याक्सीमा क्यूआर कोडबाट भुक्तानी शुरु

काठमाडौं । राष्ट्र बैंकले केही समय अगाडि ल्याएको क्युआर कोडको प्रयोग चौतर्फीरुपमा बढ्न थालेको छ । गौतमबुद्ध विमानस्थलमा चल्ने भाडाका ट्याक्सीमा सोमबार क्यूआर कोड भुक्तानी प्रणाली लागू भएको छ ।

अन्तराष्ट्रिय उडान सञ्चालनको तयारीमा रहेको गौतमबुद्ध विमानस्थलबाट चल्ने ट्याक्सीमा क्यूआर कोडबाट भुक्तानी शुरु गरिएको सनराइज बैंकले जनाएको छ । सनराइज बैंकको क्यूआर कोड प्रयोग गरी यो भुक्तानी प्रणाली शुरु भएको हो ।

लुम्बिनीमा राष्ट्र बैंकको क्षेत्रीय कार्यलयले सो क्यूआर कोडको शुभारम्भ गर्‍यो । कार्यक्रममा राष्ट्र बैंक र सनराइज बैंकका पदाधिकारीको उपस्थित रहेको थियो ।

नेपालमा डिजिटल बैंकिङ प्रणालीको आवश्यक्ता महशुस गरी लुम्बिनी प्रदेशमा क्यूआर कोड विस्तार गरेको राष्ट्र बैंकले बताएको छ ।

क्यूआर कोड प्रयोग गरेपछि विमानस्थलमा चल्ने ट्याक्सीहरुमा क्यूआर कोड भुक्तानी प्रणालीको प्रयोगले यात्रु तथा ट्याक्सी चालकलाई अझ सुरक्षित बनाउने र ट्याक्सीको विश्वसनीयता ढब्ने बैंकको विश्वास छ ।

यसैगरी नेपाल बैंकले पनि पाल्पा जिल्लामा एकैपटक एकसय १८ व्यवसायीलाई क्यूआर कोडको माध्यमबाट भुक्तानी प्रणाली शुरु गरेको छ ।

बैंकका अनुसार पाल्पा जिल्ला भित्रका ढाका कपडा व्यवसायी, कृषक, कानूनी सेवा व्यवसायी, सहकारी, विद्यालय मोटरसाइकल मर्मत पसल, होटल रेष्टुरेन्टलगायलका विविध क्षेत्रमा व्यवसायीलाई क्यूआर कोड वितरण गरिएको छ ।