इन्टरनेटमा फिल्म पाइरेसी आरोपमा युवक पक्राउ, ‘डमरुको डन्डिबियो’ लगायत फिल्म लिक्ड

काठमाडौं । ‘डमरुको डन्डीबियोँ’ लगायतका फिल्म इन्टरनेटमा पाइरेसी गरेको आरोपमा प्रहरीले एक २५ वर्षे युवकलाई पक्राउ गरेको छ ।

चलचित्र विकास बोर्डमा मंगलबार आयोजित प्रेसमिटमा प्रहरीले पक्राउ गरिएका युवक र घटनाबारे जानकारी दियो ।

लमजुङको बेशीसहर घर भएका सुजन परियारलाई पक्राउ गरि मुद्दा चलाउने तयारी भैरहेको जानकारी उक्त प्रेसमिटमा दिइयो । परियारले सिनेमा घर एपबाट अनाधिकृतरुपमा केही फिल्म पाइरेसी गरि टेलिग्राम एपमा अपलोड गरेको जनाइएको छ ।

अभिनेता खगेन्द्र लामिछाने र सागर खरेलले संचालनमा ल्याएको उक्त सिनेमा घर एपबाट डमरुको डन्डीबियोँ, सरौतो लगायतका फिल्म पाइरेसी गरेको जनाइएको छ ।

एप संचालक खरेलले कानुन बमोजिम कार्वाही हुने ढंगले परियारविरुद्ध मुद्दा चलाइने बताए । अभिनेता लामिछानेले पाइरेसीका कारण फिल्म उद्योगले मार खेप्नुपरेको बताउँदै पशुपतिप्रसाद फिल्म पाइरेसीको पीडा अहिलेसम्म भोगिरहेको स्मरण गरे ।

उक्त अवसरमा अभियुक्तलाई भौतिकरुपमा उपस्थित नगराई प्रहरीका प्रतिनिधिले तस्विर र जानकारी सार्वजनिक गरेका थिए । परियारविरुद्ध इन्टरनेटमा अनाधिकृतरुपमा फिल्म पाइरेसी गरेको आरोप लगाइएको छ । परियारलाई महानगरीय अपराध महाशाखाले पक्राउ गरि टेकुस्थित महानगरीय प्रहरी परिसरमा राखेको छ ।