वामदेवको जुक्ति : ओली र प्रचण्डलाई घेराबन्दी गरेर एकता (भिडियो)

काठमाडौं । विभाजित नेपाल कम्युनिष्ट पार्टीको एकताका लागि जुटेका उपाध्यक्ष वामदेव गौतमले पार्टी एकताका लागि आफूले नयाँ जुक्ति सोचेको बताएका छन् ।

बिहीबार कोरोनाभाइरस विरुद्धको खोप लगाउन सिभिल अस्पताल बानेश्वर पुगेका गौतमले पत्रकारहरूसँग नेकपा एकताका लागि केपी शर्मा ओली र पुष्पकमल दाहाल ‘प्रचण्ड’ लाई घेराबन्दी गर्नुपर्ने बताएका हुन् ।

नेकपाको एकता भन्नु नै ओली र दाहालबीचको सहकार्य रहेको भन्दै नेता गौतमले दोस्रो पुस्ताका नेताहरूको दबाबमा एकता अभियानलाई सफल बनाउनुपर्ने बताए । ‘दुवै पक्षका सेकेण्ड जेनेरेसनका कामरेडहरूलाई एकताबद्ध गर्ने र एकताको पक्षमा तलदेखि नै ठूलो पंक्ति तयार गर्ने काममा म केन्द्रित छु’, गौतमले भने ।

उनले त्यस्तो पंक्तिले एकताको पक्षमा नहुने नेतालाई भोट नदिने अभियान चलाएर भए पनि एकताको पक्षमा ल्याउने बताए ।

‘दुवैजना अध्यक्षलाई एकतामा ल्याउनको निम्ति उहाँहरूको अहिलेको घेराबन्दी तोडेर एकताको पक्षमा रहेको नेपाली जनताको शक्ति, कम्युनिष्ट आन्दोलनप्रति शुभचिन्तक समर्थन गर्ने शक्तिको घेराबन्दीमा ल्याउने काममा म सक्रिय छु’, गौतमले भने ।