सुनकोशी-मरिन डाइभर्सन शिलान्यास गर्दै ओलीले भने – मलाई मधेशविरोधी भन्‍नेलाई जवाफ (भिडियो)

काठमाडौं । प्रधानमन्त्री केपी शर्मा ओलीले सुनकोशी-मरिन डाइभर्सन आयोजनाबाट १ लाख ८५ हजार बिघा सिंचाइ गर्न सकिने र ३१ मेगावाट विद्युत उत्पादन गर्न मिल्ने दुई मुख्य फाइदा देखाएका छन् ।

आज सिन्धुलीको कुसुमटारमा आयोजनाकाे शिलान्यास गर्दै ओलीले भने, ‘यो महत्वपूर्ण आयोजना हो, यसले जमिनमुनि दबिएको पानीको सतहमा आउने पानीले माटो मलिलो बनाउँछ । पर्यावरणलाई समेत सन्तुलित बनाउँछ ।’

‘यो आयोजनाले तराई र पहाडलाई जोड्नुका साथै एउटा ठूलो कुराको जवाफ दिन्छ । केपी ओलीलाई मधेशविरोधी भनेर तराईमा पस्न नदिने भन्थे । तर, केपी ओलीलाई मधेशमा पस्न नदिए पनि तराई मधेशमा पानी पठाइन्छ । मुख्य मन्त्रीज्यूलाई म भन्न चाहन्छु मलाई तराई मधेशमा पस्न नदिएर केही भएन पानी चाहिं पस्न दिनुहोला । तराईमा त्यस्ता जनता छैनन्, मलाई केही छैन अर्को कमला सुनकोशी डाइभर्सनबाट थप १ लाख ७० हजार हेक्टर क्षेत्रफलमा सिंचाइ पुगेपछि तराईवासीहरूले आफैं गेट बनाउनेछन्’, ओलीले भने ।

उनले भने, ‘हाम्रो यो देशको पानी देशभरि नै पुर्‍याउनुपर्छ ।’ हावाको उदाहरण दिंदै उनले भने, ‘हावालाई छेक्न मिल्दैन । तराई सबै हाम्रो, बारा, पर्सा , सर्लाही र रौतहट पनि हाम्रै हो उनको भनाइ थियो ।’

आयोजना निर्माणमा एक मिनेट पनि ढिला नगर्न प्रधानमन्त्रीले निर्देशन दिएका छन् ।