मोतीपुर औद्योगिक क्षेत्रको पूर्वनिर्धारित शिलान्यास कार्यक्रम नरोकिने

रुपन्देही । रुपन्देहीको बुटवल उपमहानगरपालिकास्थित मोतीपुर मोतीपुरस्थानीयले औद्योगिक क्षेत्रको शिलान्यास कार्यक्रम रोक्न माग गरे पनि औद्योगिक क्षेत्र व्यवस्थापन लिमिटेड जसरी पनि पूर्वनिर्धारित शिलान्यास कार्यक्रम नरोक्ने जनाएको छ ।

नेपाल औद्योगिक व्यवस्थापन लिमिटेडले शुक्रबार मोतीपुर औद्योगिक क्षेत्रको शिलान्यासको कार्यक्रम राखेर सबै तयारी गरेको जनाएको छ । यसअघि १३ गतेको लागि तय भएको शिलान्यास कार्यक्रम स्थगित भएपछि शुक्रबारको लागि अर्को कार्यक्रम तय गरिएको हो ।

औद्योगिक क्षेत्रको फागुन २१ दिउँसो अर्थमन्त्री विष्णु पौडेलले शिलान्यास कार्यक्रमको तयारी गरिएको छ तर सो कार्यक्रमका लागि बनाइएको मञ्च बिहीबार साँझ स्थानीयले भत्काइदिएपछि विवाद झन् बढेको हो ।

शिलान्यासको निर्णयले परिवारका सदस्यहरु विक्षिप्त भएको स्थानीयको भनाइ छ । उनीहरुले बस्ती र जोतभोगको जग्गा उपलब्ध गराइ बाँकी जग्गामा मात्र औद्योगिक क्षेत्र स्थापना गर्न माग गरेका छन् ।

आफूले जोतभोग गरेको जग्गा मोतीपुर औद्योगिक क्षेत्रको नाममा गएको भन्दै सुरुदेखि नै विरोध गर्दै आएका स्थानीयले शिलान्यास कार्यक्रम अवरोध गर्ने बिहीबार पत्रकार सम्मेलन गरेर जानकारी दिएका छन् भने केही दिन अगाडि औद्योगिक क्षेत्र व्यवस्थापनमा ज्ञापनपत्र बुझाएका छन् ।

२०७३ सालमा स्थलगत निरिक्षण विना ३ हजार ६२ घर र करिब २ सय ५० विघा जग्गा सहित ८ सय १३ विघा जग्गा रातारात औद्योगिक क्षेत्र व्यवस्थापन लिमिटेडको नाममा पारेको अहिले पनि गासँबासको ग्यारेन्टी नगरी औद्योगिक क्षेत्र निर्माण अघि बढाउन खोजेको उनीहरुको आरोप छ ।

अफूहरुको विरोधको कार्यक्रमलाई कमजोर नठान्न र धरपकड भएमा जस्तोसुकै कदम चाल्न पछि नपर्ने शुद्धोधन गाउँपालिका ४ का स्थानीय रामप्रसाद पाण्डेको भनाइ छ ।

यता औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले भने शिलान्यास कार्यक्रम नरोकिने बताएका छन् । ‘स्थानीयले अवरोध गरेमा शान्ति सुरक्षाको काम सरकारको हो । हामीले शिलान्यास रोक्दैनौं’–उनले भने–‘सरकारी जग्गा ओगटेर बस्ने, वार्ता पनि नगर्ने, काम पनि गर्न नदिएर सँधैभरि कहाँ हुन्छ र ?’

बस्नेतले आफूले पटक पटक गएर स्थानीयसँग छलफल गरेको बताए । ‘दर्जनौपटक स्थानियसँग छलफल गरेको छु, मलाई कुन कित्तामा कसको घर छ भन्ने सबै थाहा छ ।’उनले भने–‘कसको के समस्या छ, म वान टु वान छलफल गर्न तयार छु ।’ साँच्चिकै सुकुम्बासी हो भने कसरी बस्ती व्यवस्थापन गर्न सकिन्छ भनेर लिमिटेडले भूमिसुधार मन्त्रालयसँग पनि कुरा गरेको बस्नेतले बताए ।

बस्नेतले देशभरको सेड्युल अनुसार औद्योगिक क्षेत्र निर्माणको काम अघि बढाएको बताए । उनले अहिले शिलान्यास नगरे बजेट पार्न समस्या हुने उल्लेख गरे । ‘यो अहिले छुट्यो भने यहाँको बजेट सबै बाँके जान्छ । जति सक्दो काम अघि बढ्यो त्यति फाइदा हुन्छ ।’
उनले औद्योगिक क्षेत्र निर्माण हुँदा कसैलाई पनि विस्थापित नगर्ने बताए । अहिले अव्यवस्थित बस्ती रहेको र अब व्यवस्थापनसहितको औद्योगिक क्षेत्र निर्माण हुने उनको भनाइ छ ।

xयस क्षेत्रमा औद्यागिक क्षेत्र बनाउने सरकारी निर्णयमा अब ढिलाई गर्न नहुने रुपन्देही उद्योग संघका अध्यक्ष बाबुराम बोहोरा बताउँछन् । उनले लामो समय उद्योगीले कुरेका छन् तर ढिलाई भएको छ, अब कुनै बहानामा राकिनुहुँदैन, स्थानीयका समस्या तत्काल बसेर समाधान खोजिनुपर्दछ, उनले भने ।