चलचित्र विकास र सेन्सर बोर्डमा पाँच सदस्य नियुक्त

काठमाडौं । संचार मन्त्रालयले चलचित्र विकास बोर्ड र चलचित्र जाँच समितिका रिक्त सदस्य पदमा नियुक्ती गरेको छ । बोर्डको रिक्त सदस्यमा नुवाकोटका अर्जुनकुमार डंगोल, मोरङका प्रकाश भट्टराई, फनिन्द्रकुमार कट्वाल (राज) नियुक्ती भएका छन् ।

डंगोल फिल्म निर्माता एवं गायक हुन् । भट्टराई निर्देशक र कट्वाल फिल्म अभिनेता हुन् ।

चलचित्र जाँच समिति (सेन्सर बोर्ड)मा ओखलढुंगाका सन्तोषकुमार थापा र मोरङकी मीनाक्षी कोइराला नियुक्ती भएका छन् ।

संचार मन्त्रालयमा आयोजित समारोहमा नियुक्त सदस्यहरुलाई प्रमाणपत्र दिँदै संचारमन्त्री पार्वत गुरुङले विकृति र विसंगतिरहित चलचित्र क्षेत्र बनाउन भूमिका खेल्न आग्रह गरे ।

उनले नियुक्त सदस्यहरुलाई मर्यादित भएर काम गर्न आग्रह गरे । उक्त अवसरमा चलचित्र विकास बोर्डका अध्यक्ष दयाराम दाहाल पनि उपस्थित थिए । सबैजनाको कार्यकाल दुई–दुईवर्षको हुनेछ ।