सुन्दरीजलमा मेलम्चीको पानी देखाउँदै ओलीले भने- यस्तोमा हो लड्डु खाने !

काठमाडौं । प्रधानमन्त्री केपी शर्मा ओलीले मेलम्चीको पानी सुन्दरीजलमा खसेसँगै लामो सपना पूरा भएको बताएका छन्।

शनिबार मेलम्चीको पानी काठमाडौंमा खस्ने कार्यक्रमको अवलोकनपछि सम्बोधन गर्दै ओलीले आफ्नो कपाल फुल्दा पूरा भएको बताए।
‘
‘कुरा भएको त धेरै भयो’ ओलीले भने, ‘कुरा चल्दा मेरो कपाल कालै थियो । पूरा हुँदा मेरो कपाल कतै कालो रहेन ।’ आफ्नै पार्टीबाट काम हुन नदिएको कुरा आफूले गरेको र आज त्यो प्रमाणित भएको बताए।

‘लामो समयपछि सपना पूरा भएको छ’ उनले भने, ‘मुख्य उपलब्धि हासिल गरेका छौं । यसै सरकारका पालामा । कहिलेकाहीं आफ्नै पार्टीबाट काम हुन दिएनन् भन्नुपर्थ्याे । अब त प्रमाणित भयो होला नि । दिन दिनै ठूला–ठूला शिलान्यास र उद्घाटन भइरहेका छन्।’

काठमाडौंलाई पानी दिनुभएकोमा ओलीले सिन्धुपाल्चोकवासीलाई धन्यवाद समेत दिए।

‘यसक्रममा केहीले ज्यान गुमाउनुपर्‍यो’ उनले भने, ‘त्यो प्राविधिक कारणले भएको थियो । म यस सफलताको घडीमा उहाँहरूप्रति सहानुभूति जनाउन चाहन्छु ।’

प्रधानमन्त्री ओलीले प्रचण्ड र माधव समूहलाई लक्षित गर्दै भने– साथीहरु जहाँ पायो त्यहीं लड्डु खाने हैन, यस्तो बेलामा खानुपर्छ । खास खुशी भनेको यो हो ।’