काठमाडौं । मेलम्चीको पानी पिउने काठमाडौंवासीको लामो सपना अब पूरा हुने सँघारमा पुगेको छ । गत फागुन १० गते मेलम्चीको सुरुङमा हालिएको पानी आज सुन्दरीजलमा खस्यो ।
मेलम्चीको स्वागत गर्न प्रधानमन्त्री केपी शर्मा ओलीसहितको दलबल सुन्दरीजल पुगेको थियो । प्रधानमन्त्री ओलीले बटम थिचेपछि पानी सुन्दरीजलमा खसेको थियो । ओलीले यसलाई सम्पूर्ण काठमाडौंवासीका निम्ति खुशीको कुरा भएको बताएका छन् ।
सुरुङबाट आएको पानी सुरुमा फोहोर हुने भएकाले वागमतीमा फालिन्छ । सुरुङको अवस्था ठीक भएपछि पानी वितरण प्रणालीमा जोडिनेछ । आयोजनाका अनुसार त्यसका लागि अझै केही समय पर्खिनुपर्छ ।
