काठमाडौं । विश्वव्यापी महामारी बनेको कोरोना भाइरस संक्रमणविरुद्धको दोस्रो चरणको खोप अभियान आजदेखि शुभारम्भ भएकाे छ।
महाराजगञ्जस्थित त्रिवि शिक्षण अस्पताल पुगेर खोप लगाई प्रधानमन्त्री केपी शर्मा ओली अभियानको शुरूआत गरेका छन् । प्रधानमन्त्री पत्नी राधिका शाक्यले पनि सँगै खोप लगाएकी छिन् ।
दोस्रो चरणको अभियानअन्तर्गत आजदेखि देशभर ६५ वर्षमाथिका ज्येष्ठ नागरिकलाई खोप प्रदान गरिदैँ छ । वृद्धवृद्धा कोरोना संक्रमणको जोखिम वर्गमा पर्छन् ।
यस्तै हिमाली भेगका १५ जिल्लामा भने ५५ वर्षमाथिका ज्येष्ठ नागरिकलाई खोप प्रदान गरिनेछ । दोस्रो चरणमा करिब १६ लाख ज्येष्ठ नागरिकलाई खोप प्रदान गरिने उनले जनाए ।
खोप अभियान ६ हजार खोप केन्द्रबाट सञ्चालन हुनेछ । यसअघि गत माघ १४ देखि फागुन १० गतेसम्म पहिलो चरणको खोप अभियान सञ्चालन गरिएको थियो । पहिलो चरणमा ४ लाख २९ हजारलाई खोप प्रदान गरिएको थियो ।
