अध्यादेशलाई कार्यसूचीमा राखेकोले बहिष्कार गर्‍यौं : शर्मा

काठमाडौं । सांसद जनार्दन शर्माले संसद बैठकको कार्यसूचीमा असहमत रहेकोले आफूहरुले बैठक बहिष्कार गरेको बताएका छन् । संसद भवनमा पत्रकारहरूसँग कुराकानी गर्दै शर्माले शोक प्रस्तावलाई पहिलो कार्यसूचीमा राख्नुपर्नेमा अध्यादेशलाई प्राथमिकता दिइएकोले बैठक बहिष्कार गरेको बताएका हुन् ।

‘दिवंगत माननीय सदस्यहरुको अपमान गरेको महसुस भयो । शोध प्रस्तावलाई पहिलो कार्यसूची नबनाएर असंवैधानिक अध्यादेशलाई महत्व दिइएकोले बैठक छोडेका हौं’, शर्माले भने ।

सर्वोच्च अदालतको फैसलाले नेकपा एमाले र नेकपा माओवादी केन्द्र अलग-अलग पार्टीको अवस्थामा फर्किएको देखिएको भन्दै शर्माले त्यसबारे छलफल गरेर उचित निर्णयमा पुगिने बताए ।