अब घरै बसेर उद्योग दर्ता र नवीकरण, विभागले थाल्यो ‘अटोमेसन’ को काम

काठमाडौं । उद्योग दर्ता र उद्योग सम्बन्धी सबै काम अब घरबाटै गर्न सकिने छ । उद्योग विभाग ‘अटोमेसन’ मा जाने तयारीसँगै यो सुविधा हुने भएको छ ।

विभागका महानिर्देशक जिवलाल भुसालका अनुसार आउँदो आर्थिक वर्षदेखि ‘अटोमेसन’मा लानका लागि कम्पनीहरूसँग बोलपत्र आव्हानको गृहकार्य भइरहेको छ ।

‘विभाग आएर गर्नुपर्ने सबै काम घरमा नै बसेर गर्न सकिने गरी काम गरिरहेका छौं । ‘अटोमेसन’ शुरू भएपछि घरबाटै दर्ता, नवीकरण, अद्यावधिकजस्ता काम गर्न सकिनेछ’, भुसालले नेपाल प्रेससँग भने ।

घरबाटै अनलाइन प्रणालीबाट यी सबै काम गर्न सकिने भएपनि हाल डिजिटल हस्ताक्षरले मान्यता नपाएको हुँदा प्रमाणपत्र लिनको लागि भने विभागमै उपस्थित हुनुपर्ने छ ।

टेण्डर प्रक्रियापश्‍चात २ महिनाभित्र ‘अटोमेसन’ गर्ने कामको जिम्मा कुनै एक कम्पनीले पाउँने र आगामी वर्षभित्रै सेवाग्राहीले विभाग धाउनुपर्ने परम्पराको अन्त्य हुनेछ ।

अहिले नेपाली र विदेशी लगानीकर्ताले उद्योग स्थापना गर्न विभागमा नै गएर लाइन बसी काम गराउँदै आएका छन् । नेपालमा उद्योग स्थापना गर्न झण्झटिलो प्रक्रिया भएको भन्दै विदेशीहरू गुनासो गर्छन् ।

‘अटोमेसन’मा जनका लागि अर्यमन्त्रालयले सहमती दिइसकेको छ । महानिर्देशक भुसालले भने, ‘सरकारले विनियोजन गरेको १ करोड ८५ लाख रूपैयाँ गरेको छ । अब ‘अटोमेसन’को काम गर्ने कम्पनीले कम्तीमा प्रस्ताव गर्छन् त्यही अनुसार काम अगाडि बढ्छ ।’

हाल नेपालमा ८ हजार ३ सय उद्योग स्थापना भएको छ । प्रत्यक वर्ष करिब ३ देखि ४ हजार उद्योग प्रशासनिक कामको लागि उद्योग विभाग धाउँछन् ।

सरकारी सेवालाई प्रविधिमैत्री बनाउन सरकारले अहिले धमाधम काम गरिरहेको छ । विभिन्न मन्त्रालय र विभागलगायतका निकाय ‘अटोमेसन’मा लागेका छन् ।