प्रदेश सांसद न्यौपानेले भने- पद गए फेरि आउँछ, तर माओवादीमा फर्किन्न

रूपन्देही । माओवादी केन्द्रबाट प्रदेशसभा सदस्य निर्वाचित भएर ओली पक्षमा लागेका नेता दधिराम न्यौपानेले अब एमालेमा रहने घोषणा गरेका छन् । आफ्नो पद गएपनि माओवादी केन्द्रमा नफर्किने उनले बताएका छन् ।

लुम्बिनी प्रदेशसभा सदस्य तथा अर्थ, उद्योग तथा पर्यटन समितिका सभापति रहेका न्यौपानेले आफू वैचारिक रूपमै ओलीको पक्षमा लागेको भन्दै अब सांसद पद गए पनि माओवादीमा नजाने स्पष्ट पारे ।

‘म पद जोगाउन गुट चेन्ज गरेको होइन’ न्यौपानेले भने, ‘हिजो यहीँ मुखले प्रचण्ड-नेपाल समूहको कदम गलत छ भनेर भाषण गर्दै हिँडने फेरि, पद जोगाउनका लागि उनैतिर फर्किने कुरा यो हुन सक्दैन । पद गए पनि म अब माओवादीमा फर्किन्न । पद पाउनको लागि अर्को निर्वाचन पनि आउँछ ।’

न्यौपाने रुपन्देही क्षेत्र नम्बर १ को प्रदेशसभामा प्रत्यक्ष निर्वाचित सांसद हुन् । उनी भूमिगतकालमा सोही क्षेत्रबाट आन्दोलनमा लागेका प्रभावशाली नेता हुन् ।