दैलेखमा एमाले पस्यो गाउँ, पुरानै घर फर्कन कार्यकर्तालाई नेताकाे आग्रह

सुर्खेत । सर्वोच्च अदालतले नेकपालाई पुर्ववत अवस्थामा फर्काइदिएपछि नेकपा एमाले गाउँ पसेको छ । दैलेखको पुर्वी क्षेत्रमा पर्ने नौमुले गाउँपालिकामा साेमबार भएकाे कार्यकर्ता भेलामा नेकपा एमालेको व्यानरसहित नेता कार्यकर्ताले सम्वोधनसमेत गरेका छन् ।

‘हामी पुरानै घरमा पर्केका छौं । दैलेखवासी सबै जना कतै बाटो विराए पनि आफ्नै घरमा फर्किने आशा गरेका छौं ।’ इन्चार्ज लक्ष्मी प्रसाद पोखरेलले कार्यकर्तालाई सम्वोधन गर्दै भने, ‘विगतमा जे भए पनि अब आगामी दिनमा सबै एमाले मिल्नको विकल्प छैन । सबै एकै ठाउँमा आउन आवश्यक छ । विगतको इमान्दारीताको इतिहास सम्झदै सबै कार्यकर्तालाई पुरानै घरमा आउन आग्रह गर्दछु ।’

उनले एमाले नै जनताको आशा र अपेक्षाको केन्द्र विन्दु भएको बताउँदै सर्वोच्च अदालतले गरेको फैसला स्वागतयोग्य भएको बताए । भूमि आयोग दैलेखका अध्यक्ष एवम नेकपा एमालेका नेता सुर्यबहादुर शाहीले अब एमालेलाई गाउँ वस्तीमा सुदृढ गराउँदै लैजाने बताए ।

‘हामी विगतमा यो वा त्यो बहानामा विभाजित भएपनि हाम्रो मुलघर नै नेकपा एमाले हो । अब हामी अदालतको आदेशसँगै गाउँ बस्तमिा जान्छौं ।’ उनले भने, ‘नेकपा एमालेका नीति, जनताको बहुदलिय जनवादलाई अंगिकार गर्दै कमिटी गठन तथा पुर्नगठन अभियानमा लाग्न सबैलाई आग्रह गर्दछु ।’

उनले पार्टी एकताका पक्षमा लाग्न सबै कार्यकर्तालाई आव्हान गर्दै एमालेको झण्डामा गोलबद्ध भइ समृद्ध नेपाल निर्माणमा जुटन आग्रह गरे । कार्यक्रममा एमाले नेताहरु लोमन शर्मा, बखत भण्डारी, नारयण नगरपालिका प्रमुख रत्नबहादुर खड्का, नेता तेजबहादुर चन्दलगायतको सहभागिता रहेको थियो ।