महान्यायाधिवक्ता भन्छन्- नेकपाबाट जितेका जनप्रतिनिधिले एमाले वा माओवादी छान्न पाउँछन्

काठमाडौं । सर्वोच्च अदालतको फैसलाले नेकपा एमाले र माओवादी केन्द्र पुनर्जीवित भएसँगै नेकपा एकीकरणपछि निर्वाचित जनप्रतिनिधिको पद यथावत रहने महान्यायाधिवक्ता अग्नि खरेलले बताएका छन् ।

यसबीचमा भएका राष्ट्रियसभा निर्वाचन र अन्य तहका उपनिर्वाचनहरु यो फैसलाबाट सून्यमा नजाने भन्दै महान्यायाधिवक्ता खरेलले निर्वाचन आयोगले दल एकता वा यथास्थानमा रहने सम्बन्धी टुंगो लगाएपछि जनप्रतिनिधिको विषय स्वतः समाधान हुने बताए ।

खरेलले नेपाल प्रेससँग भने, ‘पहिलो कुरा त अदालतले एमाले र माओवादी भिन्न हौ भनेको होइन,नेकपा नाम अर्कैको हो,तिमीहरु ऐन बमोजिम अर्को नाम लिएर दल दर्ता जान सक्छौ भनेको छ । त्यसो नभएको अवस्थामा एमाले र माओवादी अलग अस्थित्वमा स्वतः आउने भए । आयोगले पहिले त एकता गर्ने हो भने नाम लिएर आउ भन्ला ।’

खरेलले यदि एकता नभएको अवस्थामा एमाले र माओवादी स्वतः क्रियाशील हुने बताए । त्यो बेला नेकपाबाट जितेका जनप्रतिनिधि सूर्य चिन्ह लिएर चुनावमा गएकै आधारमा एमालेका हुनुपर्छ भन्ने तर्क गलत हुने खरेलको भनाइ छ ।

सरकारका प्रमुख कानूनी सल्लाहकार खरेलले भने, त्यो अवस्था नेकपाबाट चुनाव जितेका जनप्रतिनिधिहरुलाई आ आफ्नो इच्छा अनुसार एमाले वा माओवादी केन्द्र रोज्ने स्वतन्त्रता दिनुपर्छ । लोकतन्त्रमा त्यो स्वभाविक पनि हो र त्यही नै हुन्छ होला ।’