माओवादी ब्यूँतिएपछि : प्रचण्ड ‘भित्र’, माधव–झलनाथ ‘बाहिर’
![](https://www.nepalpress.com/wp-content/uploads/2021/03/prachanda1.jpg)
काठमाडौं । नेकपा माओवादी केन्द्रको स्थायी कमिटी बैठक केन्द्रीय कार्यालय पेरिसडाँडामा बसिरहँदा पार्टी अध्यक्षका रुपमा भने माधवकुमार नेपालको नाम प्लेट टाँगिएको थियो ।
सर्वोच्च अदालतबाट बदर भएको नेकपाको प्रचण्ड–माधव समूहका अध्यक्ष नेपाल मंगलबार साँझै पेरिसडाँडाबाट बिदा भएर एमालेतिर लागे पनि उनको नाम प्लेट र कार्यकक्ष भने यथावत छ ।
यद्यपी माधव नेपाल पक्षका नियुक्त भएका कार्यालय सचिव गंगालाल तुलाधर र उपसचिव मोहन गौतम भने बुधवार माओवादी केन्द्रको बैठक शुरु हुनुअघि पेरिसडाँडाबाट औपचारिक बिदाबारी लिएर हिँडेका थिए ।
पेरिसडाँडामा माधव नेपाल अध्यक्ष र झलनाथ खनाल वरिष्ठ नेताका नाम प्लेट र कार्यकक्ष भने यथावत राखिएको छ । जबकि एमाले केन्द्रीय कार्यालय धुम्बाराहीबाट प्रचण्ड र नारायणकाजी श्रेष्ठको नाम प्लेट अदालतको फैसला आएकै दिन हटाइएको कार्यालय सचिव ईश्वरी रिजालले बताए ।