पत्रकार लुइटेलले पाएको सम्मान सोलु एफएमको पुन:निर्माणमा

विराटनगर । नेपाल पत्रकार महासंघ प्रदेश १ समितिका अध्यक्ष विक्रम लुइटेलले आफूले पाएको सम्मान रकम सोलु एफएमलाई सहयोग गरेका छन् ।

केही समयअघि आगलागीबाट क्षति पुगेको प्रदेश १ कै पहिलो सामुदायिक रेडियोको पुन:निर्माणमा सहयोग पुगोस् भनेर पत्रकार लुइटेलले सम्मान रकम सहयोगको घोषणा गरेका हुन् ।

दु:खको साथी नेपालले पत्रकारिताबाट समाजमा पुर्‍याएको योगदानको कदरस्वरूप लुइटेललाई ११ हजार रूपैयाँसहित सम्मान गरेको थियो ।

संस्थाले पहिलो वार्षिकोत्सवको अवसरमा पाँचजना पत्रकारलाई सम्मान गरेको थियो । क्यान्सरपीडित पत्रकार कमल पौडेललाई संस्थाले २५ हजार सहयोग गरेको छ ।