म्यानमार कू : सेनाको गोलीले एकैदिन २१ को मृत्यु, थप जिल्लामा प्रतिबन्ध विस्तार

सैनिक कूविरुद्ध म्यानमारमा चर्किएको प्रदर्शनमा आइतबार याङ्गुनमा एकैदिन २१ जनाको मृत्यु भएको छ । सेनाले थप जिल्लामा सैनिक कानुन लागु गर्दै प्रतिबन्ध विस्तार गरेको छ ।

पक्राउ गरिएकी नेतृ आङ साङ सू चीलाई अदालतमा उपस्थित गराउनु एकदिन अघि यो रक्तपातपूर्ण घटना भएको हो । सू चीलाई भ्रष्टाचार लगायतका आरोपमा सेनाले मुद्दा चलाएको छ ।

नेसनल लिग फर डेमोक्रेसी (एनएलडी)की नेतृ सू चीलाई रिहाइका लागि प्रदर्शन भैरहेको हो । गत नोभेम्बरमा यो दलले बहुमत प्राप्त गरेको थियो । फेब्रुअरी १ मा कू गरेलगत्तै उनलाई अज्ञात स्थलमा राखिएको छ ।

सेनाले आइतबार याङ्गुनका दुई जिल्लामा सैनिक कानुन लागु गरेको थियो भने केही चिनियाँ व्यापारिक अखडामा आक्रमण भएपछि भने सैनिक कानुनलाई विस्तार गरिएको हो ।

प्रदर्शनकारीले म्यानमारको सेनाको पछाडि चिनियाँ समर्थन रहेको आशंका गर्छन् तर सप्ताहन्तमा भएका आक्रमणमा कसको संलग्नता थियो भन्ने खुलेको छैन । गत आइतबारको घटनालाई फेब्रुअरीमा कू भए यताको सबैभन्दा हिंसात्मक भनिएको छ ।