गुटगत भेलामा नजान एमाले महासचिवको चेतावनी

काठमाडौं । नेपाल कम्युनिष्ट पार्टी (एमाले) का महासचिव ईश्वर पोखरेलले चैत ४ र ५ गते पार्टीले कुनै भेला आयोजना नगरेको बताएका छन् । एमालेको नाममा राष्ट्रिय भेला आयोजना गर्ने भनि सूचना प्रचारित गरिएको भन्दै उनले त्यसमा आफ्नो ध्यानाकर्षण भएको उल्लेख गरेका छन् ।

महासचिव पोखरेलद्वारा आज जारी विज्ञप्तिमा भनिएको छ, ‘यस्ता अनिाधिकृत गुटगत भेला नगर्न-नगराउन,भेला आयोजनाको भ्रम नफैलाउन र कसैले बोलाएमा पनि त्यस्तो अनुशासनहीन गुटगत भेलामा सहभागी नहुन नेकपा एमाले सबै नेता-कार्यकर्ताहरुलाई विशेष निर्देशन गर्दछ ।’
भेलामा सहभागी हुनेहरुलाई कारवाही हुन सक्ने संकेत पोखरेलले गरेका छन् ।

विज्ञप्तिमा उनले भनेका छन्, ‘अन्यथा मुलुकको संविधान, पार्टी र संसदीय दलको विधानको व्यवस्था एवं नियमावली बमोजिम हुने कुरा स्पष्ट गरिन्छ ।’

नेकपा एमालेको माधव नेपाल समूहले भोली राजधानीमा आफ्नो गुट भेला बोलाएको छ । प्रधानमन्त्री तथा पार्टी अध्यक्ष केपी शर्मा ओलीले पनि सो गूट भेलामा जानेहरुलाई कारवाही हुन सक्ने बताइसकेका छन् ।