‘म गुटसँग कुनै डिल गर्दिन, प्रचण्डसँगै जान कानुनी समस्या भए निवेदन लिएर आए हुन्छ’

काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओलीले अब माधव नेपालसँग गुटको नेताका रुपमा कुनै पनि डिल नहुने प्रष्ट पारेका छन् । एमालेको नाममा गुटको भेला गरेबापत मुख्य व्यक्तिबाट कारवाही शुरु हुने समेत ओलीले चेतावनी दिएका छन् ।

नेपाल प्रेसका प्रधान सम्पादक मात्रिका पौडेलसँगको विशेष अन्तर्वार्ताका क्रममा अध्यक्ष ओलीले माधव नेपाल–झलनाथ खनालहरु अहिले एमाले नरहेको समेत बताएका छन् । ओलीले भेला गरेबापत र विगतमा आफूलाई कारवाही गरेबापत माफी मागेर आएको खण्डमा स्थान दिन सकिने बताए ।

ओलीले भने– सबैले सुने हुन्छ, गुटसँग म डिल गर्दिन,पार्टीका कार्यकर्ता आ-आफ्ना ठाउँमा बस्नुपर्छ । गुटको दलबल लिएर आउन पाइदैन । पार्टीका नाममा जुन भेला गरिएको हो, कारवाही योग्य विषय हो, अब कारवाही पनि गुटलाई होइन व्यक्तिलाई हुन्छ, जो मुख्य दोषी हो त्यहाँबाट शुरु हुन्छ ।

अर्को प्रसंगमा प्रधानमन्त्री ओलीले माधव नेपाल पक्षलाई फुटेर प्रचण्डसँग जान कानुनी समस्या परेको हो भने अध्यादेश वा विधेयक ल्याइदिएर सहयोग गर्ने समेत बताए ।

ओलीले भने- फुटेर जान समस्या परेको हो भने मसँग निवेदन हाले हुन्छ, अध्यादेश विधेयक केही गरेर जान दिउँला । पार्टी भनेको स्वेच्छाले बस्ने हो, करकाप गरेर बस्ने होइन । म लोकतान्त्रिक मान्छे हुँ, बँधुवा बनाएर राख्दिन ।
ओलीले माधव नेपाल पक्षको भेलामा गएका सबैमाथि कारवाही नहुने भन्दै २५ प्रतिशत कार्यकर्ता आफूले त्यहाँ पठाएको समेत दावी गरे ।

(विस्तृत अन्तर्वार्ता  बिहीबार प्रकाशन हुनेछ)