बाइडेनको अभिव्यक्तिपछि रुसले राजदूत फिर्ता बोलायो

मस्को । एक अमेरिकी संचारमाध्यममा राष्ट्रपति जो बाइडेनले रुसी समकक्षी भ्लादमिर पुटिनलाई ‘निकै खतरनाक व्यक्ति’ बताएपछि दुई देशबीच पुनः विवाद चुलिएको छ ।

अमेरिकी चुनाव प्रभावित पार्ने प्रयास गरेको गुप्तचर निकायको निष्कर्षसहितको प्रतिवेदनबारे टिप्पणी गर्दै बाइडेनले उक्त कुरा बताएका थिए ।

बाइडेनको यो अभिव्यक्ति आएलगत्तै रुसले आक्रामक प्रतिक्रिया दिएको छ । रुसले अमेरिकाको लागि आफ्ना राजदूत अनाटोली एन्टोनोभलाई फिर्ता बोलाएको छ ।

‘अमेरिकासँगको उल्टाउनै नसक्ने क्षति’ रोक्नका लागि राजदूतलाई फिर्ता बोलाइएको रुसले बताएको छ । अमेरिकी चुनावले रुसले अवरोध गर्ने प्रयास गरेको आरोप चलिरहँदा राष्ट्रपति बाइडेनले रुसले मूल्य चुकाउनुपर्ने चेतावनी दिएका थिए ।

बाइडेनको अभिव्यक्तिमा प्रतिक्रिया जनाउँदै रुसले ‘वासिङ्टनले दुई देशीय सम्बन्धलाई अँध्यारो गल्लीमा लगेको’ जनाएको छ । राजदूत फिर्ता बोलाइएको बारे रुसी विदेश मन्त्रालयले जारी गरेको वक्तव्यमा उक्त कुरा उल्लेख छ ।

गुप्तचर एजेन्सीले तयार पारेको प्रतिवेदनमा डोनाल्ड ट्रम्पलाई जिताउन रुसले भूमिका खेलेको निष्कर्षसमेत निकालिएको छ ।