नेपाल सुपर लिग: सर्वाधिक मुल्यमा बिक्री भए दुई गोलकिपरसहित ८ खेलाडी

काठमाडौं । नेपालमा पहिलो पटक हुन लागेको फुटबलको फ्रेन्चाइज लिग- नेपाल सुपर लिग (एनएसएल)को शुक्रबार सम्पन्न अक्सनमा ८ खेलाडी सर्वाधिक २ लाख रूपैयाँमा बिक्री भएका छन् ।

अखिल नेपाल फुटबल संघ (एन्फा)ले विभिन्न तीन समूहमा खेलाडीलाई समावेश गरी १४९ जना खेलाडी अक्सनका लागि उपलब्ध गराएको थियो ।

जस क्रममा समूह सीका खेलाडीका लागि सर्वाधिक ७५ हजार, समूह बीका खेलाडीका लागि सर्वाधिक १ लाख २० हजार र समूह एमा रहेका खेलाडीको सर्वाधिक मूल्य २ लाख राखिएको थियो ।

सोही क्रममा समूह एका ८ खेलाडीहरू सुजल श्रेष्ठ,दीप कार्की, एरिक विष्ट, तेज तामाङ, विशाल सुनार, विकाश खवास, सुनिल बल र दिनेश राजवंशी दुई/दुई लाखमा अनुबन्ध भएका हुन् ।

२०१९ मा नेपालमै भएको १३औं दक्षिण एसियाली खेलकुदका स्वर्ण विजेता कप्तान सुजल श्रेष्ठलाई पोखरा थन्डर्स फुटबल क्लबले गोलाप्रथामा भित्र्याउन सफल भयो । त्यस्तै, गोलकिपर दीप कार्कीलाई पनि पोखराले नै २ लाख रूपैयाँमा किनेको हो ।

मिडफिल्डर एरिक विष्ट ललितपुरमा अनुबन्धित हुँदा अर्का मिडफिल्डर तेज तामाङ काठमाडौं रेजर्स फुटबल क्लबका लागि बिक्री भएका छन् । गोलकिपर विशाल सुनार विराटनगरका लागि २ लाख रूपैयाँमा अनुबन्ध भए ।

त्यस्तै, डिफेन्डर विकाश खवास फुटबल क्लब चितवनमा अनुबन्धित हुँदा सुनिल बल विराटनगर र दिनेश राजवंशीलाई धनगढी फुटबल क्लबले किन्यो ।