भारत र अमेरिकाले रक्षा क्षेत्रमा सहकार्य गर्ने, अमेरिकी रक्षामन्त्रीको दिल्ली भ्रमण सकियो

दिल्ली । भारत र अमेरिकाले रक्षा क्षेत्रमा थप सहकार्य गर्ने समझदारी गरेका छन् । भारत भ्रमणमा रहेका अमेरिकी रक्षामन्त्री जनरल लोएड अस्टिन र भारतीय रक्षामन्त्री राजनाथ सिंहबीच दिल्लीमा शनिबार भेटवार्ता भएको थियो ।

वार्तापछि दुबै मुलुकले जारी गरेको संयुक्त वक्तव्यमा सैनिक र प्रतिरक्षा क्षेत्रमा थप सहकार्य गर्ने उल्लेख छ । दुई समकक्षीबीचको छलफलमा प्रतिरक्षा क्षेत्रमा सहकार्य गर्ने, सूचना आदानप्रदान, दोहोरो उपकरण सहयोग गर्ने कुरामा छलफल केन्द्रित थियो ।

‘हामी दुई मुलुकले सेना–सेनाबीचको सम्बन्धलाई थप प्रगाढ बनाउने कुरामा मतैक्यता भएको छ’ अमेरिकी रक्षामन्त्रीको भ्रमण सफल भएपछि जारी वक्तव्य पढेर सुनाउँदै भारतीय रक्षामन्त्री सिंहले भने ।

‘हामी सम्भाव्य विश्वव्यापी बृहत रणनीतिक साझेदारीको मुद्दामा एकजुट हुनुपर्ने महसुस भएको छ’ सिंहले भने । भारतको उदार वैदेशिक लगानीको फाइदा लिनको लागि अमेरिकी रक्षामन्त्री लोएडलाई निम्तो दिएको थिएँ र जुन सफल पनि रह्यो ।

आफूले राजनाथ सिंहलाई बाइडेन र ह्यारिस प्रशासनले अघि सारेको आफ्ना साझेदार मित्रसँगको बलियो सम्बन्धको सन्देश सुनाएको पनि लोएडले बताएका थिए । जापान र दक्षिण कोरियापछि लोएड भारत भ्रमणमा पुगेका हुन् ।

दुईदिने भ्रमणको पहिलो दिन लोएडले भारतीय प्रधानमन्त्री नरेन्द्र मोदी र राष्ट्रिय सुरक्षा सल्लाहकार अजित डोभलसँग पनि भेटवार्ता गरेका थिए ।