लिसेस्टर ३९ वर्षपछि एफ कपको ए सेमिफाइनलमा

एजेन्सी । किङ पावर रंगशालामा म्यानचेस्टर युनाइटेडमाथि ३–१ गोलको प्रभावशाली जितपछि लिसेस्टर सिटी ३९ वर्षपछि इंग्लिस एफ ए कपको सेमिफाइनलमा पुगेको छ ।

अर्को महिना हुने सेमिफाइनलमा लिसेस्टरले साउथह्याम्प्टनसँग खेल्नेछ । गएराति नै भएको खेलमा सेफिल्ड युनाइटेडमाथि २–० को जित निकालेको चेल्सीले सेमिफाइनलमा प्रिमियर लिग लिडर म्यानचेस्टर सिटीको सामना गर्नेछ ।

लिसेस्टर सन् १९८२ को एफए कपमा सेमिफाइनलसम्म पुगेको थियो । सेमिफाइनलमा टोटनह्यामसँग पराजित रहेको थियो ।

गएराति म्यानचेस्टर युनाइटेडका प्रशिक्षक ओले गनर सोल्सायरले आफ्ना मुख्य खेलाडीहरु बुर्नो फर्नान्डेज र लुक श लाई आराम दिनुको ठूलो मूल्य चुकाए ।

लिसेस्टरका लागि केलाची हेनाचोले २ गोल गरे भने टेलिम्यान्सले एक गोल थपे । हेनाचोले २४ औं मिनेटमा गोल गरी अग्रता दिलाएका थिए । युनाइटेडका ग्रिनउडले ३८ औं मिनेटमा गोल फर्काउँदा पहिलो हाफ बराबर भयो ।

५२ औं मिनेटमा टेलिम्यान्सले लिसेस्टरलाई पुनः अग्रता दिलाए । ७८औं मिनेटमा हेनाचोले ३–१ को जित निश्चित गराए ।