फिल्म उपकरण व्यवसायी अध्यक्षमा गौचन, भुक्तानी नदिने निर्मातालाई कार्वाहीसम्मको तयारी

काठमाडौं । विश्व गौचन नेतृत्वमा नेपाल चलचित्र उपकरण व्यवसायीको नेतृत्वमा नयाँ कार्यसमिति निर्वाचित भएको छ ।

राजधानीमा सम्पन्न १३ औं साधारण सभाले नयाँ नेतृत्व चयन गरेको हो । उपाध्यक्षमा रमेश बुढाथोकी, महासचिवमा केशव घिमिरे, कोषाध्यक्षमा जीवन थापा निर्वाचित भएका छन् ।

सदस्यहरुमा माधव थापा, विश्व कल्पित, रुद्र गुरुङ, मनोज राजभण्डारी, राजन पुरी, शान्तिराम थापा, चेतनाथ तिमल्सिना निर्वाचित छन् ।

अध्यक्षमा चुनिएलगत्तै नेपाल प्रेससँग कुरा गर्दै अध्यक्ष गौचनले आफ्नो पाँचवर्ष कार्यकाल मुख्यतः दुई कुरामा केन्द्रित हुने बताए ।

उपकरणको मूल्य निर्धारण र भुक्तानी दिन बाँकी निर्मातालाई कार्वाही गर्नेसम्मका उनका एजेन्डा छन् । उपकरण व्यवसायीले लामो समयदेखि भुक्तानी नपाउँदा समस्या भएकाले पैसा नतिर्दासम्म उपकरण नदिने संघको योजना छ ।