सर्वोच्चको फैसलाविरुद्ध पुनरावलोकनमा जान माओवादीलाई कानून व्यवसायीको सुझाव

काठमाडौं । नेकपा खारेज गर्ने सर्वोच्चको फैसलाविरुद्ध पुनरावलोकनमा जाने विषयमा नेकपा माओवादी केन्द्रले कानून व्यवसायीहरूसँग छलफल गरेको छ ।

मंगलबार बिहान राजधानीमा उपलब्ध स्थायी कमिटी सदस्यहरूसहित सिंहदरबारमा भएको छलफलमा कानून व्यवसायीले फागुन २३ को सर्वोच्चको फैसलाविरुद्ध पुनरावलोकनमा जान सुझाव दिएका छन् । अदालतले नेकपा खारेज गरी एमाले र माओवादी केन्द्रलाई ब्युँताएको थियो ।

प्रमुख सचेतक देव गुरुङले पुनरावलोकनमा जान कानून व्यवसायीहरूले सुझाव दिएको जानकारी दिए । सुझावअनुसार चाँडै पुनरावलोकनमा जाने उनले बताए ।  छलफलमा वरिष्ठ अधिवक्ताहरू शम्भु थापा, मुक्ति प्रधान, रमन श्रेष्ठलगायत सहभागी थिए।

माओवादी केन्द्रीय कमिटी बैठकले पनि पुनरावलोकनमा जाने यसअघि नै निर्णय गरिसकेको छ ।