उत्तर कोरियाद्वारा दुई ब्यालेस्टिक मिसाइल प्रहार, अन्तर्राष्ट्रिय शान्तिमा खतरा : अमेरिका

प्योङयाङ । उत्तर कोरियाले विहिबार दुई क्षेप्यास्त्र जापानी समुन्द्रमा प्रहार गरेको जापान र अमेरिकाले जनाएका छन् । अमेरिकी राष्ट्रपतिमा जो बाइडेन आएपछि उत्तर कोरियाले पहिलोपटक क्षेप्यास्त्र प्रहार गरेको हो ।

राष्ट्रसंघीय सुरक्षा परिषदले हतियारबाट चुनौति हुने आशंका गर्दै प्योङयाङलाई ब्यालेस्टिक मिसाइल परिक्षणमा रोक लगाएको छ ।

जापान र दक्षिण कोरिया दुबैले मिसाइल प्रहारको निन्दा गरेका छन् । तर, जापानले आफ्नो सामुन्द्रिक इलाकामा मिसाइलका कारण कुनैपनि चट्टान नखसेको जनाएको छ ।

एसिया-प्रशान्त क्षेत्रमा सैनिक मामिला हेर्ने अमेरिकाको युएस-प्यासिफिक कमान्डले उत्तर कोरियाको आणविक गतिविधिले छिमेकी र अन्तर्राष्ट्रिय समुदायलाई खतरा उत्पन्न गरेको जनाएको छ ।

राष्ट्रपति बाइडेनले अहिलेसम्म कुनै प्रतिक्रिया दिएका छैनन् । बीबीसीकी दक्षिण कोरिया संवाददाता लाउरा बाइकरले उत्तरको मिसाइल परिक्षण अमेरिका र उसका साझेदारका लागि चुनौति भएको बताइन् ।

सन् २०१८ मा उत्तर कोरियाली नेता किम जोङ उन र तत्कालिन अमेरिकी राष्ट्रपति डोनाल्ड ट्रम्पबीच सिंगापुरमा भएको वार्तामा आणविक हतियार र लामो दूरीको क्षेप्यास्त्र परिक्षण नगर्ने सहमति भएको थियो । तर, आफ्ना साझेदारको रक्षा गर्न अमेरिका प्रतिवद्ध रहने कुरा जो बाइडेनले बताइसकेका छन् ।