मोरङका स्थानीय तहमा क्वारेन्टाइन र आइसोलेसन केन्द्र व्यवस्थापन शुरू

विराटनगर । कोरोना संक्रमणको जोखिम बढेपछि मोरङका सबै स्थानीय तहलाई क्वारेन्टाइन र आइसोलेसन केन्द्र व्यवस्थापनको प्रक्रिया थालिएको छ ।

जिल्ला कोरोना संक्रमण व्यवस्थापन समिति (डीसीएमसी) मोरङको बिहीबार बसेको बैठकले विराटनगरस्थित कोभिड अस्पताललाई तयारी अवस्थामा राख्ने निर्णय गरेको हो ।

मोरङका प्रमुख जिल्ला अधिकारी कोषहरी निरौलाका अनुसार संक्रमणको सम्भावना बढेकोले उच्च सतर्कता अपनाउन सबैलाई आग्रह गर्ने पनि निर्णय गरिएको छ । ‘क्वारेन्टाइन, आइसोलेसन र अस्पताललाई तयारी अवस्थामा राख्ने निर्णय भएको छ’, सीडीओ निरौलाले भने ।

संक्रमण दर घटेसँगै अस्पतालमा चाप कम भएको थियो । स्वास्थ्यकर्मीहलाई पनि बिदा दिइएको थियो ।

भौतिक दूरी कायम नगर्ने, मास्क र सेनिटाइजरको प्रयोग गर्ने, मापदण्ड पालना नगर्नेलाई संक्रामक रोग ऐनअनुसार कारबाही गर्ने पनि निर्णय गरेको छ ।

मोरङमा बिहीबारसम्म कोरोनाका सक्रिय संक्रमित २० जना पुगेका छन् ।